Törkiyä Balkannardağı kiyerenkelekkä borçıla

Törkiyä tışqı êşlär ministrı Mäwlet Çavuşoğlu Serbiyä tışqı êşlär ministrı Nikola Selakoviç häm Kosovo tışqı êşlär ministrı Donika Gervalla Şvarś belän ayırım-ayırım telefon aşa söyläşte. Anda ul wazıyfadaşlarına Törkiyäneñ Balkannardağı tınıçlıq häm totrıqlılıqqa härwaqıt ähämiyät birüen belderde. Çavuşoğlu töbäktä yaña kiyerenkeleklär barlıqqa kilüneñ berkemgä dä fayda kitermäyäçägen, ayıq aqıllılıq belän xäräkät itärgä kiräklegen häm Törkiyäneñ kiyerenkelekne beterü öçen qulınnan kilgänne êşlärgä äzer buluın assızıqladı.

İsegezgä töşeräbez, Kosovoda yäşäwçe härkemneñ bügennän başlap Kosovo tanıqlığı häm maşina nomerına iyä bulu mäcbüriyäte kerteläçäge belderelgännän soñ ildäge serblar kiçä kiç tön’yaqtağı çik buyı qapqaların yaptı. Şunnan soñ çuıalışlar başlandı, ildä sirena tawışları yañğıradı. Poliśiyä qayber urınnarda atu tawışları buluın, tik berkemneñ dä yaralanmawın belderde.

Kosovo xökümäte soñınnan qağıydälärneñ ber ayğa kiçekterelüen xäbär itte.

Serbiyä 2008nçe yılda ber’yaqlı räweştä bäysezlegen iğ’lan itkän Kosovonı äle haman üz cirläre şikelle kürä.