"Zur migraśiyägä işeklärebezne açarğa cıyınmıybız"
Ärdoğan G20 liderlar sammitınnan soñ jurnalistlar belän oçraştı
Törkiyä ilbaşı Räcäp Tayyip Ärdoğan İtaliyä başqalası Rimda uzğan G20 liderlar sammitınnan soñ matbuğat cıyılışı oyıştırıp sorawlarğa cawap birde. Jurnalistlarnı AQŞ ilbaşı Djo Bayden belän bulğan oçraşu qızıqsındırdı.
“Süriyädäge terrorçı oyışmalar PKK/PYDneñ Amerikadan yärdäm aluları mäs’äläsendä aña borçıluıbıznı citkerdek. Monnan soñğı çorda bolay däwam itmäyäçägenä ışanam”-dide Ärdoğan.
Bayden belän söyläşüdä xäzerge F-16 xärbi oçqıçlarınıñ modern variantı yäisä yaña F-16lar birelüe mäs’äläse dä urtağa quyılğan. İke ilneñ saqlanu ministrları prośessnı küzätep bara. “Bu mäs’älädä xörmätle Baydennıñ uñay poziśiyäsen kürdem,”-di Ärdoğan.
Jurnalistlar belän oçraşuda Taliban kontrolendäge Äfğanstannan Törkiyägä yaña migraśiyä dulqını ixtimalı turında soraw buldı. Ärdoğan ildä äle haman Süriyädäge suğıştan qaçqan 3 million 600 meñ tiräse möhacirnı da kertep 5 million keşeneñ sıyınuın xäterlätte. “Çaralarıbıznı küräbez, zur migraśiyägä işeklärebezne açarğa cıyınmıybız,”-dide ul.
