Törkiyä Gondurasnı yalğışın tözätergä çaqırdı

Törkiyä Gondurasnıñ Tel’-Avivtağı ilçelegen Qudüskä (Yerusalim) küçerüen xalıqara xoquqnı bozu bularaq kürä.

Bu xaqta tışqı êşlär ministrlığı belderü yasadı. “Gonduras bu adımı belän Qudüsneñ statusı mäs’äläsendä, BMOnıñ qararların da kertep, xalıqara xoquqnı bozdı, ike däwlätle çişeleş qaraşlarına häm regiondağı tınıçlıq ömetlärenä zarar birde,”-diyelä anda.

Gondurasnı bu yalğış adımnan kire qaytırğa çaqırdılar.

Tel’-Avivtan Qudüskä küçerelgän ilçelekneñ açılışında kiçä Gonduras däwlät başlığı Xuan Orlando Êrnandes da qatnaştı. Älege Latin Amerikası däwläte, AQŞ, Gvatemala häm Kosovadan soñ, ilçelegen Qudüstä açqan 4nçe il buldı.

Bilgele bulğança AQŞnıñ êlekkege ilbaşı Donal’d Tramp 2017nçe yılnıñ 6nçı dekabrendä Qudüsne İzrailneñ başqalası dip tanıdı. Şunnan soñ 2018nçe yılnıñ 14nçe mayında  Tel’-Avivtağı ilçeleklären älege qalağa küçerdelär.