Cir astında tağın ber qala...
Gaziantäp töbägendä antik şähär qaldıqları taptılar
Törkiyäneñ “Yäsämäk açıq hawa muzeyı häm häykäl ostaxanäse” yänäşäsendä yaña tarixi qaldıqlar tabıldı. Älege cirlek Gaziantäp töbägendä urnaşqan häm UNESKOnıñ Bötendön’ya mirasınıñ waqıtlıça isemlegenä kertelgän.
Gaziantäp universitetınıñ arxeologiyä bülege häm qazınular törkeme citäkçese, professor Atilla Ängin töbäktä törle öslek tikşerenüläre ütkärülären citkerde. Şul waqıtta qayber tarixi qaldıqlarğa tap bulalar. Bu ber şähär cimerekläre bulıp çığa.
“Älege qala nıgıtma divarları belän äyländerep alınğan häm ike taş rudniğı bar. Yäsämäk tabılğan mäydannan tağın da yuğarıraq, könçığış taba suzıluçı 3 yarım çaqrım ozınlığında häm yaqınça 1 çaqrım kiñlegendä zur qalqulıq. 200 gektarğa yaqın mäydanğa cäyelä. Bik zur qala,”-dip söyli Atilla Ängin.
Professor äytüençä, cirlektä georadar häm geomagnit êşçänlekläre alıp barğannar. Näticädä cir astında da qorılmalar buluı açıqlanğan. Tarixi urında qazınular däwam itä.
