Asteroidnıñ uzıp kiteşen töşerep aldılar

İstanbul universitetı observatoriyäseneñ ğamäli häm fänni tikşerenülär üzäge “1998 OR2” adındağı gigant asteroidnıñ Cir yanınnan uzıp kitüen töşerep aldı.

1998nçe yılnıñ 24nçe iyünendä açılğan älege kük ciseme moña qadär bilgele bulğan iñ yaqtı häm zur asteroidlarnıñ berse. Anıñ diametrı 2 kilometr 400 metr. Ul Cirgä 6,2 million çaqrım yıraqlıqta uzıp üzeneñ ğalämdäge yulçılığın däwam itä.  

 İstanbul universitetınıñ astronomiyä häm ğalämne öyränü bülegennän professor Adnan Ökten fevral’ ayı başınnan birle “1998 OR2”neñ xäräkäten küzätep baruların belderde. Anıñ 29nçe aprel’dä Cirgä yaqın noqtadan uzaçağın belülären dä äytte ul. İsäpläwlärgä qarağanda, kük ciseme planetabızdan sekundına 8,7 çaqrım tizlek belän yıraqlaşa.

Adnan Ökten añlatqança, bu asteroid Qoyaş tiräli turın 1344 köndä tämamlıy. Anıñ Cirgä kiläse yaqınlaşuı 2079nçı yılnıñ 16nçı aprelendä kötelä. Ul waqıtta kük ciseme belän planetabız arasında 2 million 200 meñ çaqrım ğına ara qalaçaq.