Vizasız säyäxät turında belderülär

Törkiyä tışqı êşlär ministrı Mäwlet Çavuşoğlu Rusiyä belän vizalarnı beterü öçen adımnar yasawların söyläde. Ul İskeşähärdä êşmäkärlär häm ictimağıy oyışmalarnıñ wäkilläre belän oçraştı. Ministr anda Awrupa Berlege belän viza irege söyläşülärendä 72 kriteriydan 6sınıñ ğına ütälmiçä qaluın belderde.   

“Şimdi bu 6 kriteriynı da söyläşäbez. Aldağı könnärdä cämäğat’çelekkä xökem çığaru reforması strategiyäse belän urtaqlaşaçaqbız. Êşmäkärlek dön’yasın da kertep, barlıq keşelärneñ irek mäydannarın açaçaq häm qarşındağı çikläwlärne yuqqa çığaraçaq reforma östendä êşlibez,”-di ul.

Çavuşoğlu Awrupa Berlege belän Tamğaxanä berlege kileşüe modernizaśiyäse öçen alıp barılğan söyläşülärgä dä qağıldı.

“Şengen vizasın beterü öçen êşçänlek alıp barğanda Awrupa Berlege belän Tamğaxanä berlege kileşüen zamançalaştıru mäs’äläsendä söyläşülärne qabat başlaw öçen oçraşularnı arttırdıq. Bu härkemneñ faydasına. Ägär zamançalaştıru tormışqa aşsa, Awrupa Berlege däwlätläreneñ yartısınnan kübe Törkiyädän tağın da nığraq fayda küräçäk,”-di ministr.

Çavuşoğlu başqa däwlätlär belän irekle säwdä yäisä preferenśial’ säwdä kileşüe söyläşüläreneñ däwam itüe turında äytte.  Tizdän Ukraina häm Paqıstan belän älege dokumentlar imzalanaçaq.

“Gruziyä, Ukraina häm Moldova şikelle illär belän pasportsız säyäxätnı kerttek. Xäzer Rusiyä belän dä vizalarnı beterü öçen adımnar yasadıq, ber cirdän başladıq. Tizdän bötenläy beterü öçen zur tırışlıq kürsätäbez,”-dide Törkiyä tışqı êşlär ministrı Mäwlet Çavuşoğlu.