Ärdoğan: “İslam illäreneñ teläktäşlek êçendä buluı zarur”

İlbaşı Räcäp Tayyip Ärdoğan Süriyäneñ tönyağında oçışqa tıyılğan imin töbäkneñ buldırıluınıñ häm watandaşlar suğışınnan qaçqan xalıqnıñ kire qayta aluı öçen 5 meñ kvadrat çaqrımlıq mäydannıñ terrordan arındırıluınıñ maqsat itelüen belderde.

Üzäge Qatarda urnaşqan “Rotana” televideniyäsenä äñgämä birüçe İlbaşı Ärdoğan töbäktäge soñğı täräqqiyätlärne bäyäläde.

Süriyäle tınıç oppoziśiya belän xezmättäşlekkä nigezlänep xäräkät itelüen assızıqlawçı İlbaşı Räcäp Tayyip Ärdoğan “Färat qalqanı” xäräkäte belän “DEAŞ” terror oyışmasınnan çistartılğan Cärablusqa 30 meñ belän 40 meñ keşeneñ kire qaytuın belderde.

İlbaşı Ärdoğan: "Musul – musullılarnıñ, Tälafär - tälafärlelärneñ. Berkemneñ dä biregä kilep kerü xoquqı yuq. Musul “DEAŞ” terror oyışmasınnan çistartılğannan soñ da biredä barı tik sönni ğaräplär, törekmännär häm sönni kördlär qalırğa tiyeş”, - dip äytte.

 "Sıyınuçı qardäşlärebez öçen 12 milliard yarım dollar sarıf ittek. Bu – bezneñ keşelek wazıyfabız”, - dip äytüçe İlbaşı Ärdoğan Könbatışnıñ cawaplılıqtan qaçuına, xalıqara oyışmalarnıñ Süriyäle sıyınuçılar öçen barı tik 520 million dollar sarıf itüenä basım yasadı.

Ärdoğan Süriyädä 600 meñ watandaşın ütergän Bäşar Äsädneñ kitüeneñ zarurlığın, qaluınıñ mömkin bulmawın da assızıqlap äytep uzdı.

Törkiyä İlbaşı böten tozaqlarnıñ häm plannarnıñ İslam dönyasına yünälüen, şuña kürä dä İslam dönyası illäreneñ ber-berse belän xezmättäşlek häm teläktäşlek êçendä buluınıñ zarurlığın belderde.

İlbaşı Ärdoğan Misır-Törkiyä mönäsäbätläreneñ cayğa salınuınıñ tüntäreleş belän çitläşterelgän êlekke İlbaşı Möxämmäd Mursi belän tüntäreleşkä qarşı buluçılarnıñ barısınıñ da irekkä cibärelüenä bäyle buluına basım yasadı.