"Änkara citäkçelege tırışlıqları täqdirgä layıq"

Törkiyä ilbaşı Räcäp Tayyip Ärdoğan räsmi säfär belän Änkarağa kilgän İtaliya prem’yer-ministrı Mario Dragi belän İlbaşı Rezidenŝiyasendä üzara söyläşü, xökümätlärara oçraşu utırışı häm kileşülärgä qul quyu tantanasınnan soñ matbuğat oçraşuı oyıştırdı.

Törkiyä däwlät başlığı Dragi belän xezmättäşlek mömkinlekläreneñ üsterelüe mäs’äläsen quzğatuların belderde.

Ärdoğan ber jurnalistnıñ aşlıq probleması belän bäyle sorawına Qara diñgez koridorınıñ zur ähämiyätkä iyä buluın äytep: “Söyläşülärebezne däwam itteräbez çönki süz bu aşlıqnıñ bar dön’yağa ireşüe turında bara. Mäsälän, bezneñ xäzerge waqıtta bu mäs’älälärdä problemabız yuq fäqat dön’yada bar. Ayıruça Afrikada citdi qıyınlıq küzätelä häm bez bu mäs’älädä Rusiyä häm Ukraina liderlarına aradaşçı bulırğa häm monı Berläşkän Millätlär Oyışması tüşäme astında Xörmätle Antonio Guterreş belän dä söyläşep, däwam itterik dip telibez. 1 atna – 10 kön êçendä bu söyläşülärebezne arttırıp, näticägä ireşergä tırışaçaqbız,” – dide.

Mario Dragi isä Qara diñgezdä aşlıq koridorınıñ açıluı öçen Änkara quyğan tırışlıqlarnıñ täqdirgä layıq buluın häm BMOnıñ älege koridor belän bäyle östendä êşlägän planda da Törkiyäneñ töp rol’dä buluın citkerde.

Törkiyä ilbaşı soñınnan İtaliya prem’yerı xörmätenä räsmi kiçke aş mäclese oyıştırdı.

Ärdoğan belän İtaliya prem’yer-ministrı Mario Dragi İtaliyan-Törek Duslıq oçraşuı öçen oyıştırılğan İlbaşı idaräseneñ Simfoniya orkestrı konŝertın da qaradı.

Maxsus konŝert başqala Änkarada İlbaşı Rezidenŝiyasendä quyıldı.

Ärdoğan konŝert istälegenä Dragiğa Donizetti Paşa tarafınnan Soltan Abdülmäcit öçen yazılğan häm 1839-1861nçe yıllarda Marş-ı Sultani bularaq qullanılğan Mäcidiyä gimnı notaları yazılğan räsemne büläk itte.