Törkiyä-Ärmänstan arasında hawa yökläre säwdäse

Tışqı êşlär ministrlığı Törkiyä häm Ärmänstan arasındağı mönäsäbätlärne cayğa salu barışınıñ maxsus wäkilläre ilçe Särdar Qılıç häm Ärmänstan Parlamentı başlığı urınbasarı Ruben Rubinyannıñ söyläşüläre turında yazmaça belderü yasadı.

Qılıç häm Rubinyan arasındağı dürtençe söyläşüneñ comğa könne Awstriya başqalası Venada uzdırıluı citkerelgän belderüdä:

"Taraflar Törkiyä belän Ärmänstan arasındağı ciröste çigeneñ ike ilgä baruçı öçençe il watandaşlarınıñ kiçüenä mömkin bulğan iñ yaqın waqıtta açıluı mäs’äläsendä kileşügä ireşte häm bu mäs’älädäge kiräkle barışnıñ başlatıluı qararına kilde”, - dip äytelde.

Belderüdä: “Ayıruça Törkiyä belän Ärmänstan arasında turıdan-turı hawa yökläre säwdäseneñ mömkin bulğan iñ yaqın waqıtta başlatıluı mäs’äläsendä kileştelär häm şuşı maqsattan çığıp kiräkle barışnıñ başlatıluı qararın qabul ittelär”, - dip bilgeläp uzıldı.

Şul uq waqıtta söyläşülärdä soñğı maqsat bulğan ike il arasında "tulısınça normalläşüneñ täêmin itelüe” yünäleşendä yasala alınaçaq başqa anıq adımnarnıñ da quzğatıluı citkerelgän belderüdä taraflarnıñ cayğa salu barışınıñ alşartsız däwam itelüenä qağılışlı kileşülärenä qabat basım yasawı äytelde.