Altun: "Bez tınıçlıq öçen tırışırğa tiyış"

İlbaşı idaräseneñ êlemtä başlığı Fahrettin Altun Rusiyä-Ukraina suğışında Törkiyäneñ här şartta maqsatınıñ ğadel tınıçlıqqa öleş kertü buluın belderde

1848747
Altun: "Bez tınıçlıq öçen tırışırğa tiyış"

Altun 5nçe iyül’dä ütkäreläçäk Törkiyä-İtaliya 3nçe xökümätlärara sammit aldınnan İtaliyanıñ “Il Messaggero” gazetınıñ sorawlarına cawap birde.

Törkiyäneñ Ukrainada tınıçlıqnı urnaştıru öçen tırışlıq kürsätüen xäterlätep, suğışnıñ betüe häm tınıçlıq kileşüe tözelüe mömkinme, yuqmı digän soraw uñayınnan Altun Törkiyäneñ xosusıy wazğıyäte buluın häm İlbaşı Räcäp Tayyip Ärdoğannıñ köçle liderlığında Ukraina krizisınıñ başınnan birle şuşı köçen tınıçlıq öçen qullanırğa tırışuın äytte.

Ukrainada suğışnıñ başlanuı belän Montrö kileşüe xökemnären ğamälgä kertep, xärbi köymälärneñ Qara diñgezdän uzuın tuqtatuların äytüçe Altun ber ük waqıtta Ukraina xalqına citdi külämdä humanitar yärdäm citkerülären iskärtep uzdı.

Fahrettin Altun:

"Törkiyäneñ här şartta maqsatı ğadel tınıçlıqqa öleş kertü. Şul uq waqıtta bu suğışnı mömkin bulğança ozaytu fayda kiteräçäk, dip ışanğan akyorlar bar. “Suğış ozaysa, Rusiyä köçsezläner” diyıp uylıylar häm ukrainalılarğa barı tik suğışnı ozayta alaçaq qadär yärdäm kürsätälär. Törkiyä berqayçan da bolardan bulmadı, monnan soñ da bulmayaçaq. Bez tınıçlıqqa ışanırğa, tınıçlıq öçen tırışırğa tiyış”, - dip belderde.

Êlemtä başlığı Altun Törkiyäneñ Şveśiya belän Finlyandiyanıñ NATO äğ’zalegenä qarşı çığuınıñ xäterlätelüe uñayınnan da:

"Awrupa Berlegeneñ terror oyışmaları isemlegendä buluına qaramastan “PKK”nıñ bäyläneşle illärdä (Şveśiya belän Finlyandiyada) aqça cıyuına, suğışçı tuplawına häm propaganda yasawına kirtä quyılmıy. Ber ük räweşle “PKK”nıñ Süriyä törkeme bulğan “YPG”gä häm Törkiyädä tüntäreleş omtılışın yasağan “FETÖ”ğa ışanıçlı urın täêmin itälär. Bu mäs’älälärdä daimi häm anıq adımnar yasalğanına bez ışanmıyça torıp Şveśiya belän Finlyandiyanıñ NATO äğ’zalegenä riza bulmıybız”, - dip äytte.



Bäyläneşle xäbärlär