Altun: “BMO yañadan şäkelländerelergä tiyış”
Törkiyä İlbaşı idaräseneñ êlemtä başlığı Fahrettin Altun BMOnıñ global’ tınıçlıq, mullıq häm ğadälät idealläre nigezendä “Tağın da ğadel dönya mömkin” çaqıruına yaraşlı räweştä yañadan şäkelländerelüeneñ zarurlığın äytte
Fahrettin Altun İlbaşı idaräseneñ êlemtä räislege tarafınnan Argentina başqalası Buenos Airesta oyıştırılğan “Berläşkän Millätlär Oyışması İminlek şurası reforması: xalıqara tärtipneñ yañadan tözelüenä yaña qaraş panele”ndä qatnaşuçılarğa video yullama belän möräcäğät itte.
Berläşkän Millätlär Oyışmasınıñ İkençe Bötendönya suğışı tudırğan cimerüdän soñ dönyada şuşındıy däräcädä cimerüçe suğışlarnıñ qabat yäşänmäwe öçen 1945nçe yılda Törkiyä dä qoruçı äğ’za bulğan 51 il tarafınnan tözelüen xäterlätüçe Altun xalıqara tınıçlıqnı häm iminlekne täêmin itü häm saqlap qalunıñ oyışmanıñ iñ töp maqsatı bularaq bilgelänelüen belderde.
Altun ütkändä Bosniya-Hersegovinada, Ruandada, Süriyädä, Kosovada yäşängän keşelek dramasın totqarlawda çarasız qalğan oyışmanıñ iñ soñğısı Rusiyäneñ Ukrainağa qarşı yasağan häm äle haman däwam itüçe höcümnäre waqıtında da oxşaş çarasızlıq ürnägen kürsätüen bilgeläp uzdı.
BMOnıñ xäzerge qorılışı belän global’ mäs’älälärgä çişeleş tügel, çişelmäwçänlek östäwen küp tapqır kürülären citkerüçe Altun:
"Suğışqan taraflardan berseneñ yäki krizisnıñ taraflarınnan berseneñ BMOnıñ daimi äğ’zase buluınıñ barışlarnı niçek itep tığınçıqlawın kürdek. BMO şuşı qorılışı belän zäğif, cäberlängän yäisä xaqlı bulğan belän bergä tügel, köçle biş daimi äğ’zaseneñ yanında taraf. BMO xäzerge qorılışı belän zolım yasawçığa qarşı tawışın çığara almaslıq wazğıyättä. Monıñ töp säbäbe oyışmanıñ qorılış strukturasındağı problemalar”, - dip äytte.
Xalıqara tınıçlıqnıñ häm iminlekneñ tağın da êffektiv saqlana alınuı öçen yaña BMO proyıktlanıluınıñ zarurlığına basım yasawçı Altun:
"Xörmätle İlbaşıbıznıñ beldergäne kebek, barı tik biş ilneñ genä böten dönyanıñ yazmışına täêsir itäçäk mäs’älälärdä qarar qabul itüe ni äxlaqi, ni ğadel. Dön’ya biş ildän zurraq. Küp qotıplı, küp üzäkle, küp mädäniyätle, tağın da kiñ qolaçlı häm ğadel dönya tözü mömkin. Berläşkän Millätlär Oyışmasınıñ global’ tınıçlıq, mullıq häm ğadälät idealläre nigezendä “Tağın da ğadel dönya mömkin” çaqıruına yaraşlı räweştä yañadan şäkellänüe kiräk”, - dip bäyäläw yasadı.
