Qalın: “İminlek borçılularıbız qänäğätländerelmässä, barış alğa kitmäyäçäk”

İlbaşı idaräse süzçese İbrahim Qalın Şveśiya häm Finlyandiyanıñ NATO äğ’zalege söyläşüläre belän bäyle bularaq: "Törkiyäneñ iminlek borçıluları konkret adımnar belän, bilgele ber grafik nigezendä ütälmägän oçraqta barışnıñ alğa kitmäyäçägen bik açıq itep kürsättek,” – dide.

İbrahim Qalın İlbaşı qolliyätendä Şveśiya häm Finlyandiya wäkillekläre belän ütkärelgän söyläşüdän soñ matbuğat oçraşuın oyıştırdı.

Törle yözlärgä, şäkellärgä häm üzgä räweşlärgä kerep qarşılarına çıqqan terrorçılıqqa qarşı qatğıylıq belän köräş alıp barularınıñ NATO konśepśiyasınıñ da iñ töp nigezlärennän bersen täşkil itüenä basım yasawçı Qalın:

"Törkiyäneñ iminlek borçıluları ayıruça Törkiyägä qarşı terrorçılıq êşçänlegen däwam itüçe “PKK, PYD/YPG”, “DHKP-C” häm “FETÖ” kebek terror oyışmalarınıñ bigräk tä Awrupa illärendä, qayber NATO äğ’zase illärendä häm xäzerge waqıtta kön tärtibebezdä bulğan Finlyandiyadağı häm Şveśiyadağı barlığı belän bäyle. Bez äñgämädäşlärebezgä “PKK/PYD” häm “YPG” arasında bernindi ayırma bulmawın, bolar arasında yasalğan ayırımlılıqnıñ bezneñ cähättän hiçber mäğ’näseneñ häm bärabärlegeneñ bulmawın açıqtan-açıqtan belderdek,” – dip äytte.

Bu ike ildän soñğı 10 yılda qaytarıluı soralğan terrorçılar mäs’äläsen dä quzğatuların añlatuçı Qalın:

"Bügengä qadär Şveśiyadan 28, Finlyandiyadan 12 qaytaru taläbebez buldı. Fäqät, qızğanıç, bügengä qadär bolarnıñ bersenä dä uñay cawap almadıq. Bolarnıñ säbäplären qarağan çaqta, bez dos’yälären häm xisapların üzlärenä kürsätkän çaqta da bezne ışandıra alaçaq hiçber yuridik, xoquqi nigezneñ alğa quyılmağanın kürdek. Bu borçılularıbıznı da äñgämädäşlärebez belän urtaqlaştıq. Şulay uq saqlanu sänäğäte ölkäsendä Törkiyägä qarşı qullanılğan açıqtan-açıq yäki yabıq, tar yäisä kiñ qolaçlı härtörle sankśiyälärneñ xäzer ük beterelüe ömetlärebezne dä citkerdek,” – dip belderde.

İbrahim Qalın: “Törkiyäneñ iminlek borçıluları konkret adımnar belän, bilgele ber plan-kalendar nigezendä qanäğätländerelmägän oçraqta barışnıñ alğa kitmäyäçägen bik açıq itep kürsättek,” – dip äytte.