Törkiyä İlbaşı: “Şveśiyanıñ bezgä quyğan qoral êmbargosın çitkä quyıp tora almıybız"

İlbaşı Ärdoğan Gölcük diñgez arsenalı citäkçelegendä oyıştırılğan tantanada çığış yasadı.

Törkiyäneñ yaña tör su astı köymäläreneñ texnik üzençälekläre belän tañ qaldıruına basım yasawçı Ärdoğan: “Bıyıldan başlap här yıl bez ber su astı köymäbezne xezmätkä alıp, 2027nçe yılğa qadär 6 su astı köymäbezne flotqa tapşıraçaqbız”, - dide.

İlneñ tarixınıñ hiçber çorında bäyä tülämiçä mömkinlekkä iyä bulmawına, bik awır köräşlär alıp baruına basım yasawçı Ärdoğan: ““DEAŞ”nıñ çik buyı vilayätlärebezne nişan itep alğan raketa höcümnäre belän buışqan könnärdä hawa saqlanu sistemabız sütelep alıp kitelde. Bezgä aqçağa birelmägän qorallar “DEAŞ” belan köräş sıltawı belan qulı qanlı terror oyışmalarına (PKK) yök maşinaları belän tapşırıldı. Törkiyä terror koridorı belän çolğap alınırğa telände. Bez dus dip belgän illärneñ xıyanätenä, berlektäş dip belgän illärneñ ayaq uyınnarına qaramastan terrorçılıqqa qarşı uñışlı buldıq. Törkiyä saqlanu ixtıyacların qanäğätländerüdä häm 40 yıllıq terrorçılıq belän köräşendä berlektäşlärennän kötkän yärdämne kürmäde,” – dip belderde.

Şveśiyanıñ NATO äğ’zalege möräcäğätenä dä tuqtalıp uzuçı Törkiyä Däwlät başlığı: “Şveśiyanıñ bezgä qarata qullanğan qoral êmbargosın çitkä quyıp tora almıybız, monıñ aqılğa sıyarlıq añlatması da yuq. NATOda bez uynağan rol’ açıqtan-açıq bilgele bulğan çaqta äle haman berlektäşlärebez belan çikläwlärneñ beterelüen söyläşäbez. Bezneñ kötkännärebez ütälergä, anıq adımnar yasalırğa tiyış,” – dip äytte.