Törkiyä -regionnıñ totrıqlılıq êlementı

Törkiyä ilbaşı Räcäp Tayyip Ärdoğan Änkaradağı Millät kitapxanäsendä “Kitapxanä äñgämäläre” programması qısalarında ilneñ törle poçmaqlarınnan cıyılğan yäş’lär belän oçraştı. Anda ilbaşı sorawlarğa cawap birep Finlyandiyä häm Şveśiyäneñ NATOğa kerü mäs’äläsenä dä tuqtaldı. Ärdoğan separatist terrorçı oyışma PKK/YPGne üzenä sıyındırğan älege ike ilneñ ittifaq’qa quşıluına qarşı çığaçaqların äytte. Monnan tış, ul Şveśiyäneñ Törkiyägä sankśiyä kertüen dä xäterlätte.

Ärdoğan NATOnıñ iminlek oyışması buluın assızıqlap bolay däwam itte: “Mondıy iminlek oyışması êçendä terrorçı oyışmalarnıñ buluın qabul itä almıybız. Şuña kürä nıqlı räweştä bu säyäsätebezne däwam itäçäkbez. Finlyandiyä belän Şveśiyäneñ NATOğa kerüenä “yuq” diyäçägebezne tiyeşle keşelärenä söylädek häm yulıbıznı şulay däwam itäçäkbez”.

Ärdoğan Rusiyä-Ukraina suğışı belän bäyle sorawğa cawap birde. Ul Törkiyäneñ älege ike däwlät belän bäyle balanslı säyäsät alıp baruın, däwlät başlıqları Vladimir Putin häm Volodimir Zelenskiy belän bäyläneşlärne qubarıp atarğa cıyınmawların assızıqladı. Ul ikese belän dä telefon aşa söyläşülär alıp baruın äytte. “Çönki yaña bötendön’ya suğışı kilep çığuınıñ regionıbızğa da, dön’yağa da hiç faydası yuq,”-dide ilbaşı.

“Regionda totrıqlılıq êlementı bulırday däwlät bar ikän, ul - Törkiyä, monı saqlarğa telibez,”-dip söyläde Ärdoğan.