Ärdoğan 19nçı may belän qotladı

Törkiyä ilbaşı Räcäp Tayyip Ärdoğan 19nçı may - Atatörkne iskä alu, yäş’lär häm sport bäyräme yñayınnan qotlawnamä yulladı. Ul ğazıy Mostafa Kämal Atatörkneñ törek yäş’lärenä atağan älege bäyrämneñ millätneñ täwäkkällegen häm bäysezlek yaratuın dön’yağa iğ’lan itkän häm köräş ruxına qabat can örgän kön buluın belderde.

Ärdoğan 1919nçı yılnıñ 19nçı mayında törek xalqınıñ kolonial’ basıp aluçı köçlärgä qarşı berdäm bulıp ayaqqa qalquın, mäñgelek däwlätläre Törkiyä cömhüriyäten tözü öçen külämle köräşkä kereşep dastannarğa tiñ kaharmanlıqlar kürsätüen, näticädä ciñügä ireşülären xäterlätte.  

“Bügen dä tarixtan alğan köç häm bäysezlek ruxı belän kiläçäkkä barabız, Törkiyäneñ üsüe häm zurayuın kirtälärgä teläwçelärgä qarşı köräşäbez.  Zur häm quätle Törkiyäne tözü telägebezne sündermiçä totabız, bu yulda iñ ähämiyätle mömkinlegebez bularaq kürelüçe yäş’lärebezgä här tarmaqta yärdäm itäbez, alarğa forsat biräbez ,”-dip söyläde Ärdoğan.

İlbaşı Törkiyädä mäğarif, sport, iminlek, säyäsät, säwdä, sänğat’ - här mäydanda yäş’lärne aldınğı saflarda kürergä teläwlären belderde.

“İlebezneñ 2023nçe yılğa maqsatları häm 2053nçe yılnı küzallawların tormışqa aşıru öçen yäş’lärebez belän bergä barunı däwam itäçäkbez. Bu yäş’lär belän 19nçı may Atatörekne iskä alu, yäş’lär häm sport bäyrämen qabat qotlıym, ğazıy Mostafa Kämal Atatörektän başlap Bäysezlek suğışınıñ barlıq kaharmannarın xörmät belän iskä alam,”-dide Törkiyä ilbaşı.