Törkiyä İlbaşı: “NATOnıň kiňäyüe bezneň sizgerlegebezne xörmät itkän däräcädä mäğ’näle”

İlbaşı häm “Ğadälät wä qalqınu” partiyası Ğomum başlığı Ärdoğan partiyasınıň Törkiyä Böyek Millät Mäclesendäge törkem cıyılışında çığış yasadı.

NATOdağı berlektäşlärdän Törkiyäneň sizgerleklären aňlawların häm moňa yaqlaw kürsätülären kötülären citkerüçe Ärdoğan:

“Törkiyäneň üz çiklären saqlaw tırışuların aňlawların kötäbez. Sez (Finlyandiya häm Şveśiya) bezgä terrorçılarnı birmisez, annan soň bezdän NATOğa kerü öçen xuplaw kötäsez. “PKK” separatist terror oyışmasın yaqlap, äğ’zalek öçen xuplaw soraw ipsezlekter. Bezgä terrorçılarnı qaytarmağan illärneň NATO äğ’zalegenä bez “äye” dip äytä almıybız. NATOnıň kiňäyüe bezneň sizgerlegebezne xörmät itkän däräcädä mäğ’näle,” – dip belderde.

Ärdoğan: “(Şveśiya häm Finlyandiyanıň NATO äğ’zalege mäs’äläsendä oçraşular ütkärü öçen) düşämbe könne (Törkiyägä) kilergä telilär ikän, buşqa arımasınnar didem, terror oyışmaları äle dä Şveśiyada yöri,” – dip äytte.

“Bez berkemneň cirenä dä küz salmıybız, bez iminlegebezgä yanawçı ğamällärne çığanağında qorıtuda täwäkkäl,” – dip basım yasawçı Däwlät başlığı: "NATOdağı urtaqlarıbız Törkiyäne nişan itep alğan terror oyışmalarına qoral häm xärbi kiräk-yaraqlar cibärmädeme? Terror oyışmaları tağın da köçäysen diyıp yözlärçä million yevronı alarğa birälär,” – dip iskärtep uzdı.