Törkiyä-Azärbaycan diplomatik mönäsäbätläreneñ 30 yıllığı

Törkiyä Tışqı êşlär ministrlığınnan yasalğan yazma belderüdä, 30 yıl êlek "Yañadan diplomatik mönäsäbätlärneñ urnaştırıluı turındağı protokol"ğa qul quyıluı belän ike il arasındağı diplomatik mönäsäbätlärneñ başlatıluı citkerelep, Azärbaycan bäysezlege iğ’lan itelüennän soñ diplomatik mönäsäbät urnaştırğan berençe ilneñ Törkiyä buluı xäterlätelde.

Azärbaycannıñ 1991nçe yılnıñ 29nçı üktäbr’ könne xalıqara cämäğätçelekneñ tigez xoquqlarğa iyä äğ’zase buluına qağılışlı iradäsen köçle räweştä bilgeläwenä basım yasalğan belderüdä Törkiyäneñ ul çaqta ikelätä bäyräm yäşäwe citkerelde.

Belderüdä: "Aradan uzğan 30 yıl buyı Törkiyä yaxşı köndä dä, naçar köndä dä dustı häm qardäşe Azärbaycannıñ yanında buldı, monı qaharman Azärbaycan ğaskäreneñ 44 könlek watan suğışı belän cirlären yawdan azat itüennän soñ toyğan zur söyeneç belän tağın ber märtäbä kürsätte”, - dip äytelde.

İke ilneñ dä 30 yıl êlekkegä qarağanda tağın da köçleräk buluına iğ’tibar yünältelgän belderüdä ike ilneñ qardäşlege häm yaqın xezmättäşlegeneñ urtaq töbäklärendä tınıçlıqnıñ häm totrıqlılıqnıñ zur ışanıçına da äylänüe iskärtelep uzıldı.

Belderüdä 2021nçe yılnıñ 15nçe iyün’ könne imzalanğan Şuşa Bäyannamäse belän berlektäşlek däräcäsenä citkerelgän mönäsäbätlärneñ monnan soñ da däwam iteläçägenä basım yasalıp: "Cömhüriyätebezgä nigez saluçı Gazıy Mostafa Kemal’ Atatörekneñ: “Azärbaycannıñ şatlığı bezneñ söyeneçebez, yazmışı bezneñ yazmışıbız” süzlärenä häm ğomum milli lider Xäydär Aliyev beldergän “ber millät, ike däwlät” şiğarenä turı kilgän totış näq’ menä şuşıdır inde”, - dip belderelde.