Ärmänstan belän çarter oçışları başlanaçaq

Mäwlüt Çavuşoğlu başqala Änkarada 2021nçe yılğa qağılışlı tışqı säyäsätne bäyäläw cıyılışında çığış yasadı.

Törkiyä belän Ärmänstan arasındağı mönäsäbätlärne cayğa salu barışın bäyäläwçe Çavuşoğlu här ike tarafnıñ da maxsus wäkilne wazıyfalandıruın xäterlätep: "Berençe cıyılış Ärmänstannıñ teläge nigezendä Mäskäwdä uzaçaq. Ämma berençe cıyılıştan tış bez êlemtälärneñ turıdan-turı buluın telibez”, - dip belderde.

İke il arasında ike yaqlı çarter oçışlarınıñ tizdän başlanaçağına iğ’tibarnı yünältüçe Çavuşoğlu Ärmänstan-Törkiyä arasında ike yaqlı säfärlär belän ber rättän turıdan-turı êlemtälärgä küçep, mönäsäbätlärne cayğa salu mäs’äläsendä yasalaçaq adımnar belän bäyle yul kartasın bilgeläwneñ zarurlığına basım yasadı.

Ministr Çavuşoğlu, Ärmänstan belän mönäsäbätlärne cayğa salu barışında Azärbaycan belän kiñäşläşüneñ häm koordinaśiyanıñ bik möhim buluın iskärtep uzıp: "Ärmänstan şuşı yünäleştä däwam itär, dip ışanam. (Ärmänstannıñ) yullamaları uñay, ämma ğamällären kürergä telibez. Öç yaqlı bularaq ta adımnarnı yasıy alabız”, - dide.

Mönäsäbätlärne cayğa salu öçen yaña adımnarnıñ yasaluınıñ zarurlığına basım yasawçı Çavuşoğlu: "Bu – Qavqaznıñ totrıqlılığı, tınıçlığı häm mullığı öçen möhim bulaçaq. Bu räweşle biredä maxsus wäkillärneñ berençe oçraşuı, yul kartası mäs’äläsendä fiker almaşuı bulaçaq. Annan soñ daimi oçraşuları, telefonnan söyläşüläre faydalı bulır”, - “dip uylawın citkerde.

Çavuşoğlu vizadan azat itelüe belän bäyle bularaq ta: "Awrupa Berlege başqa mäs’älälärdä bulğanı kebek bu ölkädä dä süzen totmaw öçen waqıt belän uynarğa däwam itä”, - dip belderde.