Törkiyä parlamentı başlığı Şäntop Serbiyada

Törkiyä Böyek Millät Mäclese başlığı Mostafa Şäntop parlament wäkillege belän bergä Tön’yaq Makedoniya, Serbiya häm Montenegro (Qarataw) buylap räsmi êşlekle säfäreneñ ikençe tuqtalışı Serbiya başqalası Belgradqa kitte.

Şäntopnı Belgrad Nikola Tesla hawa mäydanında Törkiyäneñ Belgrad tulı wäqalätle ilçese Hami Aksoy häm başqa räsmilär qarşı aldı.

Törkiyä parlamentı başlığı Şäntop Serbiya İlbaşı Aleksandar Vuçiç häm Baş ministr Ana Brnabiç belän oçraşaçaq.

Serbiya Milli parlamentına baraçaq Şäntop wazıyfadaşı Ivica Daçiç belän küreşep söyläşäçäk häm urtaq matbuğat oçraşuın oyıştıraçaq.

Mostafa Şäntop sişämbe könne Tön’yaq Makedoniya başqalası Skopiyada Törekçä öyrätü bäyräme mönäsäbäte belän oyıştırılğan kiçädä qatnaşqan ide.

Şäntop biredä yasağan çığışında Tön’yaq Makedoniyada yäşäwçe töreklärneñ räsmi bäyräme bulğan 21nçe dekabr’ Törekçä öyrätü köne mönäsäbäte belän Tön’yaq Makedoniyağa kilüe öçen şat buluın citkerep: "Tön’yaq Makedoniyada törekçäneñ däwamınıñ şuşı geografiyadağı qardäşlekneñ köçäyüe, ilneñ mädäni baylığı häm säyäsi köçeneñ kütärelüe cähätennän bik ähämiyätle buluına ışanam”,  dip äytkän ide.