“Törkiyä iq’tisadı irekle bazar qağıydälärenä yaraşlı räweştä däwam itäçäk”

İlbaşı Ärdoğan yäkşämbe könne “Ğıylem taratu” waqıfınıñ Dolmabahçä sarayında oyıştırılğan 2021nçe yıl Ğıylem taratu büläkläre tantanasında çığış yasadı.

Çığışında iq’tisadqa tuqtalıp uzuçı İlbaşı Ärdoğan ildä xakimiyättä bulğan soñğı 19 yılda mäğariftän sälamätlek saqlawğa, iminlektän ğadälätkä, transporttan ênergetikağa, şähär tözeleşennän sportqa qadär här ölkädä salınğan köçle asqorması belän millätne layıq bulğan tormış standartlarına qawıştıruların añlattı.

Ärdoğan: "Ägär inde Törkiyä global’ krizislarğa qarşı bu xätle çıdam ikän, krizislanı forsatqa äyländerü mäs’äläsendä bu çaqlı üz-üzenä ışana ikän, monıñ artında näq’ menä şuşı köçle asqorma bar. Xäzer şuşındıy uq köräşne iq’tisadta alıp barabız”, - dip äytte.

“Üseş sannarıbız häm citeşterüebez belän, êş belän täêmin itüebez häm êksportıbız belän, byudjet tigezlege-balansları belän böten kürsätkeçlär ilebez cähätennän dönyaküläm uñışqa işaräli”, - dip belderüçe Ärdoğan, xökümät başqaruçı iq’tisad säyäsäteneñ tulısınça üzläre bilgelägän qısada alğa taba alıp barıluına basım yasap, törek iq’tisadınıñ bügengä qadär bulğanı kebek monnan soñ da irekle bazar iq’tisadı qağıydälärenä yaraşlı räweştä däwam itäçägen iskärtep uzdı.