Ärdoğan: “Farsı qultığı illäre belän xezmättäşlekne yaxşırtırğa tırışabız”
İlbaşı Räcäp Tayyip Ärdoğan, Farsı qultığınıñ barlıq xalıqların çın qardäş bularaq kürülären belderep: “Farsı qultığı illäre belän xezmättäşlegebezne şuşı añlayış belän ike yaqlı mänfäğät häm xörmät nigezendä yaxşırtırğa tırışabız”, - dip äytte
İlbaşı Ärdoğan, Qatar başqalası Dohada Qatar-Törkiyä urtaq köçlär citäkçelegenä barıp, biredäge ğaskärilärgä möräcäğät itte.
Çığışında: “Qaharman ğaskärebez ğasırlar buyı bulğanı kebek bügen dä 3 qıytğada 7 klimatta üzenä birelgän wazıyfalarnı kiräk bulğan çaqta canın fida itep başqara. Qorallı köçlärebez “ülsäm şähit, isän qalsam ğazıy” şiğare belän ilebezneñ häm dönyanıñ dürt ber yağında tınıçlıqqa, totrıqlılıqqa häm iminlekkä xezmät itä”, - dip äytüçe Ärdoğan: “Törkiyä bularaq Qatar belän bergä böten Farsı qultığı töbägeneñ xozurına häm isänlegenä bik zur ähämiyät biräbez. Bez bu cirlärdä hiç kiyerenkelek, bäreleş häm doşmanlıq kürergä telämibez. Cirastı çığanaqları cähätennän bulmasın, säwdä yağınnan bulmasın bik zur potenśialı bulğan şuşı matur geografiyanıñ qardäşlek häm teläktäşlek belän telgä alınuın, här ölkädä üseş aluın telibez”, - dip belderde.
“Kilep çığışı, mäzhäbe häm ışanuı nindi genä bulmasın, Farsı qultığınıñ böten xalıqları bezneñ çın qardäşebez”, - dip basım yasawçı Ärdoğan: “Farsı qultığı illäre belän xezmättäşlegebezne şuşı añlayış belän ike yaqlı mänfäğät häm xörmät nigezendä alğa taba alıp barırğa tırışabız. Dini, tarixi, mädäni häm tirän tamırlı keşe bağlanışlarıbız bulğan Qatarnıñ, älbättä, millätebezneñ küñelendä üzgä torışı bar. 2016nçı yıldağı 15nçe iyül’ qanlı tüntäreleş omtılışı belän bergä Qatar qardäşlärebezneñ millätebez belän kürsätkän teläktäşlegen hiç onıtmayaçaqbız. Ayıruça törek iq’tisadına spekulyativ atakalar waqıtında da Qatar daimi räweştä bezneñ yanıbızda buldı, ilebezgä ışanıçın kürsätte”, - dip iskärtep uzdı.
