Änkara häm Doxanıñ duslığı niçek sınaldı?
Törkiyä ilbaşınıñ Katarğa säfäre nisbätennän ike ilneñ mönäsäbätlärenä küz salıyq
2017nçe yılnıñ 5nçe iyüne. Soğud Ğaräbstanı, Berläşkän Ğaräp ämirlekläre, Misır häm Baxreyn Katar belän diplomatik mönäsäbätlären tuqtattı. 4 däwlät Doxanıñ terrorçı törkemnärgä yärdäm itüen alğa sörde, hawa kiñleklären Katar öçen yaptı. Riyad ta Katarnıñ tışqa açılğan berdänber qorı cir bäyläneşen özgännän soñ Farsı qultığı tarixındağı iñ zur diplomatik krizis başlandı. Bu waqıtta Soğud Ğaräbstanı, Baxreyn häm Berläşkän Ğaräp ämirlekläre 14 kön êçendä watandaşlarınıñ Katardan kitüen soradı. Üzlärennän dä katarlılarnıñ şul uq räweşle kitüe taläp itelde. Annan soñ 4 däwlätneñ 13 maddälek taläp isemlege kilde. Katardağı Al Jazeera kanalınıñ yabıluı, Doxanıñ blokada kertkän däwlätlärgä kompensaśiyä tüläwe häm Törkiyä xärbi bazasınıñ yabıluı şul maddälär arasında ide. Tik Katar, taläplärneñ suverenlıqnı bozuı sıltawı belän, alarnı ütäwdän baş tarttı. "Bu 13 maddä belän bäyle poziśiyäne bez xalıqara xoquqlarğa qarşı kilä dip sanıybız. İllärneñ suveren xoquqlarına mondıy höcüm bula almıy"
Katarğa strategik xezmättäşe Törkiyädän kiçekmästän yärdäm kilde. İlbaşı Räcäp Tayyip Ärdoğan blokada qararın döres dip tapmawların äytte. Şunnan soñ dön'ya liderları belän telefonnan söyläşülär başlandı. Krizis çişelgängä qadär Änkaranıñ aradaşçı role däwam itte. Katar krizistan alda köndälek azıq-tölekneñ 75%tan artığın qorı cir yulı belän Soğud Ğaräbstanınnan ala ide. Bu citeşsezlekne beterü öçen Törkiyä häm İrannan yök oçqıçları Katarğa kitte. Krizis başlanuğa kibetlärgä ağılğan katarlılar kiştälärdä Törkiyä tovarların kürde.
Törkiyäneñ yärdäme logistika mäydanında ğına tügel ide. Änkara Katardağı xärbi bazasın kiñäytü qararın tizlätte. Êmbargo kertelüdän soñ berniçä kön ütügä Törkiyä Böyek Millät mäclese anı rasladı. Katardağı törek ğaskäriye sanın 600gä citkerü mömkin buldı. Kuveyt häm başında Katarğa qarşı bulğan Amerika Quşma Ştatları da aradaşçı bulırğa tırıştı. Töyen 2021nçe yılnıñ 5nçe ğıynvarında çişelde. 41nçe Farsı qultığı xezmättäşlege şurası sammitında tözelgän kileşü krizisqa noqta quydı. Törkiyäneñ êmbargo waqıtında Katar yaqlı buluı regionda balanslarnı üzgärtte. Strategik xezmättäşlekneñ êmbargo säyäsäten täêsirsez itüe açıq kürende.
