Törkiyä 10 million doza büläk itä

Sälamätlek saqlaw ministrı Fäxretdin Koca koronavirus vakśinalarınıñ ixtiyacı bulğan däwlätlärgä bireläçägen belderde

1738649
Törkiyä 10 million doza büläk itä

Sälamätlek saqlaw ministrı Fäxretdin Koca Törkiyäneñ ixtiyacı bulğan däwlätlärne vakśina belän täêmin itüçe Kovaks oyışması aşa 10 million doza preparatnı iğanä itäçägen belderde. Bu xaqta ul BMOnıñ Awrupa regionı mödire Xans Kluge belän telefon aşa söyläşte.

Älege äñgämädän soñ Kluge Twitterda belderü yasadı. Anda mondıy yullar bar: “Pandemiyäne barı yärdämläşü belän ciñä alaçaqbız. Awır qış aylarına kergändä sälamätlek saqlaw sistemaları häm reanimaśiyäse problemalı bulğan Awrupa illärennän, ixtiyac tuğanda, Kovid-19 awıruların qabul itä aluları turındağı yumart täq’dime öçen doktor Fäxretdin Koca häm Törkiyägä räxmätlemen. Törkiyä pandemiyäneñ başınnan birle 160 däwlät häm 29 xalıqara oyışmağa Kovid-19 belän köräş öçen yärdäm cibärep, 11 ilgä 2 million dozadan artıq vakśina büläk itep ähämiyätle dön’yaküläm yärdämläşü ürnäge kürsätte”.

Ministr Koca isä Twitter akkauntında Klugenıñ bu yazmasına cawap birde.  

"Pandemiyäneñ başınnan birle Törkiyäneñ ilbaşı liderlığında xalıqara yärdämläşügä kertkän öleşenä iğ’tibar cälep itüegez öçen räxmät belderäm. Kovaks oyışması arqılı 10 million doza vakśina büläk itäçägebezneñ söyençesen dä sezneñ belän urtaqlaşam,”-dip yazdı ministr.



Bäyläneşle xäbärlär