"Kizüneñ iñ awır çorın ciñel üttek"

Törkiyä ilbaşı Räcäp Tayyip Ärdoğan Törkiyäneñ koronavirus kizüeneñ iñ awır çorın ciñel ütüen belderde. Ul Änkarada Bäysez mediśina häm sośial’ xezmätkärlär hönäri berlegeneñ cıyılışında çığış yasadı.

“Sälamätlek saqlaw tarmağı häm mediśina xezmätkärlärebezgä kertemnärebezneñ cimeşen koronavirus belän köräş çorında kürdek. Soñğı yöz’yıllıqnıñ iñ zur sawlıq krizisı dip bäyälänüçe häm xäzergä qadär dön’ya külämendä 5 millionnan artıq keşeneñ ğomeren özgän pandemiyädä Törkiyä, çınnan da, soqlandırğıç qazanışqa ireşte,”-dip söyläde ilbaşı.  

Ärdoğan äytkänçä, 1 million 100 meñ keşedän toruçı sälamätlek saqlaw armiyäseneñ ğadättän tış fidaqar’lege arqasında kizüneñ iñ awır çorın ciñel ütülären assızıqladı. Ul dön’yanıñ alğa kitkän däwlätlärendä tetränderüçe waqıyğalar bulğanda, mediśina xezmätkärläreneñ yärdäme belän ber watandaşnı da yaqlawçısız, çarasız qaldırmawların citkerde.