"Dardanell muyınsası" cıyılıp betä

Kiçä Törkiyädä Dardanell buğazı aşa tözelüçe küperneñ soñğı torığın cıyunı başlaw tantanalı räweştä ütte. Anda Törkiyä ilbaşı Räcäp Tayyip Ärdoğan da qatnaştı. Küper basıp aluçılarğa qarşı suğışta tarixi ciñü xörmätenä “Çanakkalä 1915” isemen yörtäçäk. Anı şulay uq “Dardanell muyınsası” dip tä atıylar. Küper Gelibolu yarımutrawın Lapseki rayonı belän totaştıra. Bu şulay uq Awrupa belän Aziyane dä berläşterüçe yul. İke qıytğa arasın 6 minutta ütü mömkin bulaçaq.

Törkiyä ilbaşı Räcäp Tayyip Ärdoğan kiçä uzğan tantanada yasağan çığışında küperneñ texnik üzençäleklärenä dä tuqtaldı. “Küperebez Çanakkalä ciñüe bulğan 18nçe mart xörmätenä 318 metr biyeklektä häm cömhüriyätebezneñ 100 yıllığı tulaçaq yılnı xäterlätep 2023 metr ozınlığında buluı belän mäğ’näle,”-dide ul häm “Çanakkalä 1915”neñ dön’yadağı iñ ozın urta torıqlı küpere buluın assızıqladı. Anı 18nçe martta qullanılışqa tapşıru planlaştırıla.

Ärdoan “Kanal İstanbul” proyektına da tuqtaldı häm anıñ belän diñgez yulı transportında tüntäreleş däräcäsendä alğarış tormışqa aşıraçaqların belderde.