Rimda G20 liderlar sammitı başlandı

Dön’yadağı aldınğı 20 zur iq’tisadnıñ liderları häm xalıqara oyışmalarnıñ wäkillären bergä cıyuçı G20 liderlar sammitı İraliyä başqalası Rimda üz êşen başladı. Aşılış Nuvola kongresslar üzägendä ütte. Qunaqlarnı beräm-beräm işek töbendä İtaliyä xökümäte räise Mario Dragi qarşıladı. Alar arasında Törkiyä ilbaşı Räcäp Tayyip Ärdoğan da bar.

Sammit Kovid-19dan soñ täwge tapqır yözgä-yöz uza.

Törkiyä ilbaşı Ärdoğan çarada qatnaşuçı AQŞ liderı Djo Bayden, Angliyä xökümäte räise Boris Djonson, Germaniyä kanślerı Angela Merkel’, Hindstan xökümäte räise Narendra Modi häm BMO ğomum särqatibe Antonio Guterriş belän äñgämä qordı.  

Liderlar soñınnan “Dön’yaküläm iq’tisad häm global’ sälamätlek” temalı berençe utırışqa kerde.

Sammitta kizü çorında iq’tisadnı torğızu, vakśina kampaniyäse häm sälamätlek belän bäyle soñğı wäzğıyät’ xaqında süz baraçaq.

Ärdoğan liderlar belän ikeyaqlı oçraşular uzdıraçaq. Anıñ, şulay uq, İtaliyä xökümäte räise Mario Dragi çaqıruında ütäçäk mädäni çarada qatnaşuı da kötelä. Törkiyä ilbaşı İtaliyä däwlät başlığı Sergio Mattarella oyıştıruçı kiçke aş mäclesenä dä çaqırulı.