"Törkiyä xalıqara sistemadağı qıyınlıqlarnı küzätep bara häm alarnı çişü öçen çaralar kürä"

Törkiyä ilbaşı idaräseneñ êlemtä bülege başlığı Fäxrettin Altun “Köç häm paradoks: 21 nçe ğasırda zur strategiyäne añlaw” teması astında uzuçı 5 nçe TRT WORLD Forumı 2021 gä videoyullama cibärde.

Ul Kovid -19 krizisınıñ salqın suğuş betkännän birle dönyağa iñ naçar waqıtta kiterep bärüen, 2020 nçe yılda dönyanıñ törle poçmaqlarında küpçelek xalıqara konfliktlarnıñ çişelmägänlegen äytte.

Altun äytüençä, bu prośess däwlätlärgä ozaq waqıtlı strategiyälär buldırırğa qomaçawlıy häm global’ yanawlarğa qarşı köräşne qıyınlaştıra.

Fäxrettin Altun xalıqara oyışmalarnıñ global’ problemalarnı näticäleräk xäl itär öçen aşığış reformağa moxtac buluın äytep uzdı.

Altun Törkiyäneñ xalıqara sistemadağı qıyınlıqlarnı küzätep baruın häm alarnı çişü öçen çaralar kürüen belderep bolay dide: “İlbaşıbız Räcäp Tayyip Ärdoğan citäkçelegendä tışqı säyäsät strategiyäsen regional’ häm global’ problemalarnı da çişä alaçaq  räweştä yañadan qarap çıqtıq. Törkiyä tışqı säyäsätçeläre Süriyä, Liviya, Ğıyraqtağı konfliktlarnı çişü öçen törle kereşülär başqardılar. Bez şulay uq barlıq yaqlarnı krizis ölkälarendä, şul isäptän Könçığış Urta diñgez häm Azärbaycan – Ärmänstan konfliktın da kertep, dialog häm konstruktiv diplomatiyädä qatnaşırğa çaqırdıq. İlbaşıbız illärne bu ölkälärdäge bäxäslärne çişü öçen xalıqara konferenśiyälär ütkärergä çaqırdı”.

Törkiyä ilbaşı idaräseneñ êlemtä bülege başlığı Fäxrettin Altun krizis waqıtında süper derjavalarnıñ liderlıq role uynawın kötü  urınına maqsatlarğa ireşü öçen başqa illär köçlären berläşterergä tiyeşlegen belderep, TRT WORLD Forumındağı çığışlar häm diskussiyälärneñ dä bu maqsatlarğa ireşergä yärdäm itüen teläde.