Çavuşoğlu: “Rusiyä häm AQŞ üz wäğ’dälären ütämilär”
Törkiyä Tışqı êşlär ministrı Mäwlüt Çavuşoğlu: “Süriyädä terrorçılarnıñ yuq itelüe öçen zarur bulğannı başqaraçaqbız”
Çavuşoğlu başqala Änkarada Nikaragua tışqı êşlär ministrı Denis Monkada Kolindres belän söyläşüdän soñ oyıştırılğan urtaq matbuğat oçraşuında Süriyädän Törkiyägä qarşı yünälgän “PKK/YPG” höcümnärenä tuqtalıp uzdı.
Soñğı waqıtta şuşındıy höcümnärneñ kürenä başlawına häm soñğı höcümnärdä Rusiyä belän Amerika Quşma Ştatlarınıñ cawaplılığınıñ da buluına basım yasawçı Çavuşoğlu: "Här ike il dä bu terrorçılarnı kim digändä 30 çaqrım kön’yaqqa taba çığaraçaqlar ide. Rusiyä Tel Rıfat häm Münbiçne çistartaçaq ide. Bu wäğ’dälär ütälmäde”, - dip äytte.
Rusiyä belän AQŞnıñ süzlären totmawın xäterlätüçe Çavuşoğlu: ““Höcümnärne gäyeplibez” dilär, ä menä bu qorallarnı kem birä alarğa, sin öyrätäseñ alarnı, annan soñ küz öçen genä gäyepläw belderüen yasıysıñ. Bu terrorçılar monda ikän, bezneñ dä çaranı üzebezneñ kürüebez kiräk. Çistartıluı öçen närsä zarur bulsa anı başqaraçaqbız”, - dip äytte.
Süriyäneñ Mera qasabasında separatist terror oyışması äğ’zaläre tarafınnan atna axırında oyıştırılğan xain höcümdä 2 törek poliśiya xezmätkäre şähit bulğan ide.
İlbaşı Räcäp Tayyip Ärdoğan da monnan aldağı könne yasağan belderüendä şuşı töbäklärdä xäräkät signalın citkergän ide.
