Äl-Aqsa mäçetenä höcüm oyıştırıldı

Törkiyä Böyek Millät Mäclese başlığı Mostafa Şentop İzrail polŝiyaseneñ Äl-Aqsa mäçetendäge cämäğat’kä qatışuına reakŝiya kürsätte.

Här Ramazan ayında bulğanı kebek İzrailneñ qırıslıq häm zolımınıñ artuın beldergän Şentop Twitterda bolay dip yazdı: “Bügen tönlä Äl-Aqsa mäçetendä namaz uquçılarğa oyıştırılğan höcüm däwlät terrorçılığı bulıp tora. Qırıslıq häm zolım taratuçı tınıçlıq häm xozur urnaştıra almas. Äk-Aqsa mäçetendäge terrorçılıqnı lägnätlim.”

İlbaşı yärdämçese Fuat Oktay da şäxsi ber televideniye kanalında açıqlaw yasap, İslam dön’yasınıñ tarqaluı tudırğan forsatlardan faydalanuçı İzrail däwläten terrorçılıq däwläte bularaq kürülären belderde.

Tışqı êşlär ministrlığınnan yasalğan açıqlawda da İzrail iminlek köçläre Äl-Aqsa mäçetendä ğıybadät qılğan fälästinlelärgä qarata oyıştırğan häm şaqtıy fälästinle watandaş yaralanğan höcümnärne qırıs räweştä ğayepläwe belderelde.

Törkiyäneñ tışqı êşlär ministrı Mäwlüt Çavuşoğlu, ilbaşı süzçese İbrahim Qalın, Êlemtä idaräse başlığı Faxrettin Altun, Ğadälät häm qalqınu partiyase süzçese Ömer Çelik tä höcümne qırıs räweştä ğayepläwlären, fälästinlelär yanında buluların citkerdelär.

İzrail poliŝiyase kiçä kiçke sägät’lärdä Äl-Aqsa mäçetenä kerep, biredäge keşelärgä tawışlı bomba belän höcüm itte.

İzge cämiğta tawışlı häm gaz bombası qullanıp, cämäğat’çelekne taratırğa tırışqan İzrail poliŝiyaseneñ Äl-Aqsa mäçeteneñ Silsile qapqasında da fälästinlelärneñ kerüenä röxsät birmäwennän soñ bäreleş çıqtı.

İzrail poliŝiyaseneñ höcümendä ayıruça xatın-qız häm balalar panikağa birelde.

Şeyx Cerrah mäxälläsendä isä ğaräplär belän yähüdlär arasında çıqqan ğawğadan soñ yähüdlär fälästinlelärgä iftar waqıtında ut açqan ide.

İzrail poliŝiyaseneñ Äl-Aqsa mäçete, Şam qapqası häm Şeyx Cerrah mäxälläsendäge höcümnärendä 205 keşe yaralandı.