Ärdoğannan Çavuşoğluna räxmät süzläre

İlbaşı häm “Ğadalät wä qalqınu” partiyası ğomum başlığı Räcäp Tayyip Ärdoğan Tışqı êşlär ministrı Mäwlüt Çavuşoğluna Greśiya tışqı êşlär ministrı Nikol Dendias belän ütkärgän cıyılışta birgän cawapları uñayınnan räxmät äytte.

Ärdoğan partiyasınıñ Törkiyä Böyek Millät Mäclesendäge törkem cıyılışında yasağan çığışında uzğan atnada başqala Änkarağa kilgän Greśiya tışqı êşlär ministrınıñ wazıyfadaşı Mäwlüt Çavuşoğlu belän ütkärgän matbuğat oçraşuına tuqtalıp uzdı.

Ärdoğan: "Tışqı êşlär ministrıbızğa grek tışqı êşlär ministrı belän ütkärgän oçraşu waqıtında birgän cawapları säbäbe belän räxmät äytäm. Hiç baş iymäyäçäkbez. Bezneñ millätebez hiç tä muyınında mondıy äsirlek çılbırı belän yäşäyäçäk millät tügel”, - dip äytte.

Çavuşoğlu Dendias belän oyıştırğan matbuğat oçraşuı waqıtında: "Bez şuşı täwge oçraşunıñ tağın da uñay atmosferada däwam itüen telär idek, fäqät Nikos Dendias yasağan çığışında, qızğanıç, ilemä qarata hiç qabul itelmäyäçäk gäyepläwlär yasadı. İñ êlek Törkiyäneñ Greśiyanıñ möstäqillek xoquqların bozuın äytte. Monı qabul itüebez mömkin tügel. Törkiyä Cömhüriyäte üz xaq-xoquqların, bigräk tä Könçığış Urta diñgezdä häm Kipr törekläreneñ xoquqların yaqlıy ala häm bez yasağan adımnar da xoquqlarıbıznı saqlawğa yünälgän. Biregä kilep Törkiyäne gäyepläsägez, min dä bolarnıñ cawabın birergä mäcbür bulam. Ayıruça Törkiyädä bez grek pravoslaviyası azçılığın grek pravoslaviyası bularaq qabul itäbez, ämma sez “Min törek” dip äytüçe töreklärgä: “Yuq, sin törek tügel, barı tik möselman sin”, - dip äytüegez dä keşeçä dä tügel, xalıqara xoquqqa da turı kilmi”, - dip cawap birgän ide.