Çavuşoğlu: “Äfğanstanda säyäsi çişeleş öçen kiñ qolaçlı utnı tuqtatuğa ixtıyac bar”

Çavuşoğlu Tacikstan häm Äfğanstan räistäşlegendä Duşanbedä oyıştırılğan “Aziyanıñ yöräge -İstanbul barışı”nıñ 9nçı ministrlar konferenśiyasında yasağan çığışında Äfğanstan iminlegeneñ, totrıqlılığınıñ häm mullığınıñ härkem öçen bik möhim buluın iskärtep uzdı.

Törkiyädä “Aziyanıñ yöräge-İstanbul barışı”nıñ başlawınnan 10 yıl uzuın belderüçe Çavuşoğlu: "Äfğanstanğa qağılışlı äle dä iñ kiñ qırlı platforma buluınnan ğorurlanabız. Töbägebezneñ problemaları barı tik regional’ xezmättäşlek häm saqlawçanlıq ruxı belän xäl itelä alınır”, - dip äytte.

Çavuşoğlu uzğan yılda Doxada Amerika Quşma Ştatları belän “Taliban” arasında qul quyılğan kileşüneñ Äfğanstandağı tınıçlıq barışında möhim waqıyğa buluın, lakin ildä qırıslıqnıñ äle haman däwam itüen belderep: "Säyäsi çişeleş öçen kiñ qolaçlı utnı tuqtatuğa ixtıyacıbız bar”, - dip äytep uzdı.

Çavuşoğlu äkren yul uzıluına qaramastan tınıçlıq barışınıñ alğa taba barunıñ berdänber yulı buluına häm härkemneñ barışnı tulayım bularaq yaqlawnıñ zarurlığına basım yasap: "Şuşı töşençä belän häm äfğan taraflarınıñ taläpläre nigezendä Doxa söyläşülären tämamlaw häm canlandıru öçen Törkiyädä yuğarı däräcäle cıyılış ütkäräçäkbez. Cıyılışnıñ xäzerge tınıçlıq tırışularına möhim öleş kertäçägen häm Äfğanstannıñ kiläçäktäge säyäsi yul kartasına qağılışlı bäxäslärgä mäğ’näle alğarış täêmin itäçägen ömet itäbez. Uñışlı buluı öçen barığıznıñ yaqlawın kötäbez”, - dip äytte.

Çavuşoğlu Törkiyäneñ qardäş Äfğanstannıñ tınıçlığı, totrıqlılığı häm mullığı öçen “Aziyanıñ yöräge - İstanbul barışı” belän ber rättän böten platformalarda êşlärgä däwam itäçägenä iğ’tibarnı yünältte.