Törkiyä İlbaşı: ““Kovid-19”ğa qarşı köräşne köçle teläktäşlek, xezmättäşlek belän ciñä alabız”

İlbaşı Ärdoğan turıdan-turı êlemtä belän qatnaşqan İq’tisadi xezmättäşlek oyışmasınıñ 14nçe Liderlar sammitında çığış yasadı.

Ärdoğan biredä yasağan çığışında: "(Kovid-19) Bu dönyaküläm fälaqätkä qarşı köräşne barı tik köçle teläktäşlek, regional’ häm xalıqara xezmättäşlek belän genä ciñä alabız. Kürelgän zaruri çikläwçe çaralarnıñ ütä kürenmäle, proporśional’ häm waqıtlıça üzençälege, hiçşiksez, urtaq säwdäbez cähätennän bik urınlı”, - dip äytte. 

Ärdoğan 17 yıl buyı ğamälgä kertelä alınmağan İq’tisadi xezmättäşlek oyışmasınıñ säwdä kileşüeneñ waqıtnı yuğaltmıyça tormışqa aşırıluınıñ faydalı bulacağın belderde.

"Qıtaynıñ poyas häm yul iniśiativasın möhim dip tabuıbıznı, “qazan qazan” nigezendä bu kereşüne yaqlawıbıznı citkerergä telim”, - dip assızıqlawçı Ärdoğan: "2025 Vizion dokumentında küzdä totılğan proyektlarnıñ finanslawında qullanıluı öçen Vizion fondınıñ tözelüen xuplıybız. Monnan soñ östenlegebez Qarabaxta iminlek häm totrıqlılıqnıñ urnaştırıluına yärdäm itü, 30 yıllıq (ärmän) yawınıñ zıyanın bergä beterü. İranğa qarşı qullanılğan ber yaqlı çikläwlärneñ beterelüe töbägebezneñ iq’tisadi mullığına häm totrıqlılığına öleş kertäçäk”, - dip äytte.

İlbaşı böten äğ’zalärne Tön’yaq Kipr Törek Cömhüriyäte belän mönäsäbätlärne här ölkädä üsterep, kiçergän gadelsezleklärne ciñärgä bulışırğa çaqırdı.