Qazaqstanda şaxtada şartlaw
Karaganda töbägendäge waqıyğa faciğale tögällände
Qazaqstannıñ Karaganda töbägendä şaxtada şartlaw säbäple 5 keşeneñ ğomere özelde.
Räsmi mäğ’lümatlarğa qarağanda, Şaxtinsk şähärendä cirle waqıt belän säğat’ 3 tiräsendä “Arselor Mittal Temirtau” şaxtasında gaz şartlıy. Älege waqıtta cir astında bulğan 106 şaxtaçınıñ 5se hälaq bula. Yaralanğan 4 êşçe xastaxanädä.
Şaxta şirkäte wäqalätlese Arman Kalıkov şartlawnıñ gaz drenaj qoyıların borawlağanda kisäk kenä metan çığuı arqasında buluın belderde. Ul waqıyğadan soñ 101 keşeneñ cir astınnan çığarıluın, tik şaxtanıñ töp öleşendä qalğannarnıñ ğomere özelüen xäbär itte.
Şartlaw oçrağın tikşerü êşe başlandı.
Qazaqstan ilbaşı Qasıym Cömärt Tokayev şaxtadağı şartlawda hälaq bulğan êşçelärneñ ğailälärenä qayğınamä yulladı. Ul älege waqıyğanı tikşerergä häm qorbannarnıñ ğailälärenä kiräkle yärdämne täêmin itärgä kürsätmä birüen citkerde.
Xökümät räise Alixan İsmailov ta “Arselor Mittal Temirtau” şirkäten monnan alda şaxtada qurqınıçsızlıq moxiten buldıru häm citeşterüne modernizaśiyäläw mäs’äläsendä iskärtüen assızıqlap, şartlaw belän bäyle xökümät komissiyäse buldırıluın äytte.
Bäyläneşle xäbärlär
Törki investiśiya fondı qorıla
Fond Törki däwlätlär arasındağı iqtisadi häm säwdä mönäsäbätlären üsteräçäk
Lukaşenko Azärbaycanğa kilde
Belarus' ilbaşı Ärmänstan yawınnan qotılğan Fuzuli häm Şuşa şähärlärenä bardı