Üzbäkstanda Qazan federal' universitetınıñ filialı açıldı
Bu uqu yortınıñ çit ildäge berençe filialı
Bügen Üzbäkstannıñ Cizzax şähärendä Qazan (İdel buyı) federal’ universitetınıñ filialı açıldı. Bu älege uqu yortınıñ çit ildäge berençe filialı. Anıñ açılışında Tatarstan ilbaşı Röstäm Miñnexanov ta qatnaştı. Studentlar biredä maşina tözeleşe, geologiya, programma injeneriyäse, iq’tisad, mäğ’lümati sistemalar häm texnologiyälär, menedjment, lingvistika, biomediśina, jurnalistika belgeçleklären öyränäçäk. Bu isemlek ildäge kadrlarğa ixtiyacnı isäpkä alıp tözelgän, dip yaza Tatarstan ilbaşınıñ matbuğat xezmäte.
“Filialnıñ näq’ menä Üzbäkstanda açıluı simvolik. Bezne küp’yıllıq näticäle xezmättäşlek bäyli häm ul soñğı yıllarda totrıqlı räweştä nığıy. Bu filial yärdämendä yäş’lärneñ üz illärennän kitmiçä yuğarı sıyfatlı belem alu mömkinlege tua,”-dip söyläde Miñnexanov açılışta.
Filialnıñ açıluı uqu yortınıñ tulay toraqlarındağı çiktän tış tulılıq problemasın xäl itärgä dä bulışa. Bügen Qazan federal’ universitetında 10 meñ çit il studentı uqıy. Şularnıñ 25%ı Üzbäkstannan.
KFU filialınıñ açılışında Üzbäkstan citäkçelegeneñ öleşe dä zur. Alar yärdämendä uqu yortına bina birelde, tözekländerü ütkärelde, xäzer cihazlar alu mäs’äläse xäl itelä.
Uqular 31nçe oktyabr’dä başlanaçaq. Berençe kursqa 300 student qabul itelgän, ikençegä - 59.
Bäyläneşle xäbärlär
Törki investiśiya fondı qorıla
Fond Törki däwlätlär arasındağı iqtisadi häm säwdä mönäsäbätlären üsteräçäk
Lukaşenko Azärbaycanğa kilde
Belarus' ilbaşı Ärmänstan yawınnan qotılğan Fuzuli häm Şuşa şähärlärenä bardı