Putin Mirziyayıv belän Qaraqalpaqstannı söyläşte

Rusiyä İlbaşı idaräsennän yasalğan belderügä kürä, Putin Mirziyayıv belän telefon söyläşüen ütkärde.

Qaraqalpaqstandağı wazğıyät tikşerelgän söyläşü waqıtında Rusiyä tarafı Üzbäkstan citäkçelegenä şuşı töbäktä barlıqqa kilgän wazğıyätne totrıqlılandıru kereşülären xuplawın citkerde.

İke yaqlı mönäsäbätlär dä quzğatılğan söyläşü waqıtında Putin häm Mirziyayıv illär arasındağı urtaqlıqnı kiläçäktä köçäytü yaqlı buluların rasladı.

Üzbäkstan töp qanunında Qaraqalpaqstan üzidaräle cömhüriyäteneñ statusı belän bäyle maddälärneñ üzgärteläçägenä qağılışlı qayber täq’dimnärneñ kön tärtibenä kilüennän soñ 1nçe iyül’dä Qaraqalpaqstanda rizasızlıq cıyınnarı oyıştırılğan ide.

Üzbäkstan êçke êşlär ministrlığı şuşı protest çaralarınıñ il konstituśiyäsenä kertelüe küzdä totılğan üzgäreşlärne “yalğış añlağan” bertörkem watandaş tarafınnan oyıştırıluın beldergän ide.

Şunnan soñ Üzbäkstan İlbaşı Mirziyayıv, uram cıyınnarı oyıştırılğan Nukusqa barıp, biredäge xalıq belän oçraşqan häm Qaraqalpaqstan statusınıñ üzgärtelmäyäçägen beldergän ide.

Mirziyayıvneñ protest çaralarınıñ däwam itüe arqasında qul quyğan qararnamä belän Qaraqalpaqstan üzidaräle cömhüriyätendä 2nçe avgustqa qadär ğadättän tış xäl iğ’lan itelgän ide.

Üzbäkstan Cömhüriyät baş prokuraturası isä barlıqqa kilgän waqıyğalar waqıtında 18 keşeneñ häläq buluın, 243 keşeneñ dä yaralanuın, waqıyğalar belän bäyle bularaq 516 keşeneñ qulğa alınuın beldergän ide.