Mişel’, Aliyıv häm Paşinyan Bryussel’dä oçraştı

Awrupa Berlege Şurası başlığı Şarl’ Mişel’ Azärbaycan belän Ärmänstan çik buyı komissiyalarınıñ urtaq cıyılış ütkäräçägen belderde

1830808
Mişel’, Aliyıv häm Paşinyan Bryussel’dä oçraştı

Şarl’ Mişel’ Azärbaycan İlbaşı İlham Aliyıv häm Ärmänstan Baş ministrı Nikol Paşinyan belan yäkşämbe könne Bel’giya başqalası Bryussel'däge oçraşuınnan soñ belderü yasadı.

Öçençe tapqır urtaq söyläşü ütkärülären citkerüçe Mişel’ Kön’yaq Qavqazdağı wazğıyät, minalarnıñ çistartıluı, qulğa alınğan keşelärneñ irekkä cibärelüe, xäbärsez yuğaluçılarnıñ yazmışın bilgeläw kebek mäs’älälärneñ quzğatıluın belderde.

Mişel’, çik buyı mäs’älälärenä tuqtalıp uzıp, ike ilneñ çik buyı komissiyalarınıñ berence urtaq cıyılışın ike il arasındağı çik buyında kiläse könnärdä ütkäräçägen, bu cıyılışta çiklärneñ bilgelänelüe häm çik buyı töbägendä totrıqlılıqnıñ urnaştırıluı mäs’äläläreneñ tikşereläçägen äytte.

Aliyıv häm Paşinyannıñ ike il arasında transporttağı kirtälärneñ beterelüe ixtıyacı mäs’äläsendä kileşügä ireşüen bilgeläp uzuçı Mişel’ ike lidernıñ Azärbaycan häm Naxçıvan arasında, ayıruça Azärbaycan aşa Ärmänstannıñ törle töbäkläre arasında kiçülärne häm xalıqara transport belan êlemtä asqormasın bilgeläyäçäk nigezlärdä kileşüen citkerde.

Mişel’ ike lider kileşügä ireşkän nigezlär arasında çik buyı idaräse, iminlek, kiçü tüläwläre häm xalıqara transportta tamğaxanä mäs’äläläreneñ buluın, bu mäs’älälärne ike il baş ministr urınbasarlarınıñ aldağı könnärdä qarap çığaçağın belderde.

Şarl’ Mişel’ Aliyıv belan Paşinyannıñ ike il arasındağı mönäsäbätlärne bilgeläyäçäk tınıçlıq kileşüe söyläşülären alğa taba alıp baru mäs’äläsendä dä kileşügä ireşüen äytte.

Bu mäs’äläne kiläse atnalarda ike il tışqı êşlär ministrları räislegendäge wäkilleklärneñ qarap çığaçağın citkerüçe Mişel’ sośial’ häm iq’tisadi üseş ölkäsendä Awrupa Berlegeneñ ike taraf belän êşçänlek alıp baraçağın belderde.

Mişel’ Aliyıv häm Paşinyan belan iyül’dä yäki avgustta qabat oçraşu öçen kileşülären iskärtep uzdı.



Bäyläneşle xäbärlär