Aliyev Ärdoğanğa qotlawnamä cibärde

Aliyev Azärbaycan İlbaşı idaräseneñ räsmi internet säxifäsendä näşer itelgän yullamasında, ike il arasında diplomatik mönäsäbätlärneñ 1992nçe yılnıñ 14nçe ğıynwar’ könne urnaştırıluı xäterlätelep, şuşı möhim kön mönäsäbäte belän Ärdoğannı häm qardäş törek xalqın iñ êçkersez toyğıları belän qotlawın belderde.

Törkiyä belän diplomatik mönäsäbätlär urnaştırıluınıñ Azärbaycan tarixında möhim waqıyğa buluına basım yasawçı Aliyev: "20nçe ğasırda ikençe tapqır bäysezlegen qazanğan Azärbaycannı berençe bulıp tanığan ilneñ Törkiyä buluı, annan soñ diplomatik mönäsäbätlärneñ urnaştırıluı, çın qardäşlek häm teläktäşlek ürnäge bularaq xalqıbıznıñ milli xäterendä mäñge saqlanıp qaldı”, - dip äytte.

Aliyev, Azärbaycan-Törkiyä mönäsäbätläreneñ soñğı waqıtta bik nıq üsüennän ğorurlanuın citkerep, ike ilneñ tarixi imtixannardan däräcäle räweştä häm başın nıq kütärep uzuın, "ber millät, ike däwlät” nigezeneñ ruxına bäyleleklären tağın ber qat raslawın häm yäşäwlären iskärtep uzdı.

Törek häm azärbaycan xalıqlarınıñ ğasırlarğa barıp totaşqan berdämlege, qardäşlege häm duslığı kebek nıq nigezlär östenä salınğan däwlätlärara mönäsäbätlärneñ iñ yuğarı däräcädä buluın belderüçe Aliyev 2021nçe yılnıñ iyün’ ayında Şuşada êlemtälärne berlektäşlek däräcäsenä citkergän bäyannamägä qul quyuların "bezneñ qaqşamas berdämlekne nığıtuçı möhim tarixi adım", - dip bäyäläde.