Axıska törkiläreneñ sörgengä cibärelüenä 77 yıl

Keşelek tarixınıñ qara taplarınnan berse – mesxet (Axıska) törkiläreneñ sörgenenä 77 yıl tuldı.

Gruziyäneñ Törkiyä çigendä urnaşqan Axıska 1828nçe-1829nçı yıllardağı törek-rus suğışınnan soñ imzalanğan kileşü nigezendä Rusiyägä birelä. Anda yäşäwçe mesxetlärgä qarata patşa zamanında başlanğan basım häm zolım Sovetlar Berlege çorında da däwam itä. Törki häm möselmannarğa Gruziyädä yäşäw bik awır bula.

Stalin İkençe Bötendön’ya suğışında, başqa törki xalıqlarğa bulğan şikelle, mesxetlärne dä sörü qararı çığara.

200dän artıq awıl häm şähärçektä yäşäwçe meñnärçä keşe yök häm xaywan vagonnarına töyälep ozatıla. Yannarına berni alırğa röxsät itelmi.

86 meñläp törki Axıskadan Urta Aziyäneñ törle cirleklärenä sörelä. Vagonnarğa tığızlap tutırılğan xalıqnıñ bu awır yulçılığı ber aydan artıq däwam itä. Yaqınça 17 meñe açlıq, suıq häm awırulardan ülä. Tağın 30 meñe şul uq säbäplär arqasında Urta Aziyäneñ törle töbäklärendä wafat bula.

Bügen 600 meñgä yaqın Axıska törkiye törle däwlätlärdä watannarın sağınıp yäşi. Sörgen itelgän ğailälärneñ 72se 5 yıl êlek ilbaşı Räcäp Tayyip Ärdoğannıñ kürsätmäse belän Ukrainadan Törkiyägä kiterelde häm Bitlisneñ Axlat rayonına urnaştırıldı.