Tatarstan ilbaşı Röstäm Miñnexanov İstanbulda

Bügen Tatarstan ilbaşı Röstäm Miñnexanov êşlekle säfär belän Törkiyägä kilde. İstanbulda ul maşina tözeleşe tovarları çığaruçılar berlege citäkçelege belän oçraştı. Älege berlek 200dän artıq şirkätne üz qanatı astına ala. Bu firmalar arasında azıq-tölek sänäğate, avtomobil’ çığaru, ağaç êşkärtü, plastmassa yasaw, tözeleş häm başqa tarmaqlarğa qarawçılar bar.

Oçraşu barışında Tatarstan ilbaşı Törkiyäneñ üzläre öçen çit ildäge iñ aldınğı xezmättäş buluın assızıqladı. Uzğan yıl ike arada tovar äyläneşe 360 million dollardan artıp kitkän. “Bez pandemiya arqasında beraz kimü küzätäbez. Tik kiläse yıllarda iq’tisadlarıbız torğızılır häm bez totrıqlı üseş traektoriyäsenä çığarbız dip ömetlänäm,”-dide Röstäm Miñnexanov.

Berlek äğ’zaları bıyılnıñ mart ayında Qazanda bulğan ide. Oyışmanıñ idarä räise Ämrä Sälim Tatarstannı citeşterü tarmağı üskän iñ aktiv region dip atadı. “Min küptän tügel Tatarstanda buldım häm anıñ çınnan da qızıqsındıruçı mäydan ikänen kürdem. Bez cömhüriyättäge ul yuğarı standartlarğa turı kilü öçen barısın da êşläyäçäkbez,”-dide ul.

Soñınnan Röstäm Miñnexanov törek kompaniyäse “Koç Xolding”nıñ idarä räise Ömär Koç belän oçraştı. Älege törkem dön’yaküläm êşmäkärlek êlitasın täşkil itüçe zur global’ korporaśiyälär isemlegendä.

Tatarstan öçen “Koç Xolding” belän êşläwneñ ber yünäleşe – “Tatneft’”. Tögälräk äytkändä, “Tatneft’”nıñ xoldingka kerüçe törek şirkäte “Tüpraş” belän xezmättäşlek itü mömkinlege. Röstäm Miñnexanov xolding citäkçelegen sänäğat’ mömkinlekläre belän tanışu öçen Tatarstanda çaqırdı.   

Tatarstan ilbaşı êşlekle säfär qısalarında Törkiyädä yäşäwçe tatarlar belän oçraşa häm İstanbulda tramvay yulı tözeleşe arqasında yabılıp torğan Tuqay parkı açılışında da qatnaşa.