Törek matbuğatına küzätü 15.12.2023

“Vatan” gazetı yazğança Törkiyä ilbaşı Räcäp Tayyip Ärdoğan AQŞ däwlät başlığı Djo Bayden belän kiçä telefonnan söyläşte. Ärdoğan söyläşüdä Ğazzädä küzätelüçe keşelek dramasın qısqa waqıtta tuqtatu zarurlığın, AQŞnıñ İzrailgä kürsätkän şartsız yärdämnän baş tartuınıñ utnı tuqtatunı tiz räweştä täêmin itä alaçağın, dön’ya häm AQŞ cämäğat’çelegeneñ bu taläpne soñğı könnärdä citkerüen häm qısqa waqıtta töbäktä daimi utnı tuqtatunıñ urnaştırıluınıñ AQŞnıñ tarixi cawaplılığı buluın äytte.

“Sabah” basması beldergänçä Törkiyäneñ tışqı êşlär ministrı Xakan Fidan kiçä Azärbaycanda açıqlaw yasap, Ğazzädä utnı tuqtatu aldında barı tik AQŞnıñ ğına toruına iğtibarnı cälep itte. Ministr Fidan tübändägeçä belderde: “İzrailne xuplawçılarnıñ bu küreneşne yaxşı añlawları kiräk. AQŞnıñ Berlӓşkӓn Millӓtlӓr Oyışması qararlarına tağın da küp kirtä quymawın kötäm.”

“Hürriyet” gazetı xäbärenä kürä Rusiyä däwlät başlığı Vladimir Putin kiçä oyıştırğan matbuğat oçraşuında İzrail-Xamas suğışına tuqtaldı häm Törkiyä ilbaşı Räcäp Tayyip Ärdoğannıñ Ğazzä öçen quyğan tırışlıqlarında äydäp baruçı rol’ uynawına iğtibarnı cälep itte.

“Star” basması citkergänçä Milli saqlanu ministrlığı çığanaqları AQŞnıñ Süriyädä terror oyışmalarına qarağan xuplawı belän bäyle bularaq bolay dip belderde: “AQŞ bu terror oyışmasına kürsätkän böten yärdäm häm xuplawın beterer häm bezneñ terrorçılıqqa qarşı köräşebezne êçkersez räweştä xuplar dip kötäbez.”

“Haber Türk” gazetı yazğança Sänägät’ häm texnologiya ministrı Mäxmät Fatix Kacır Xalıqara ğaläm stanśiyasendä wazifa başqaraçaq berençe törek ğaläm säyäxätçese Alpär Gäzäravcınıñ 9 ğıynwarda ğalämgä oçaçağın açıqladı.