Törek matbuğatına küzätü 13.01.2022

“Xörriyät” gazetı yazğança Törkiyä ilbaşı Räcäp Tayyip Ärdoğan räislegendä İlbaşı Rezidenŝiyasendä oyıştırılğan Saqlanu sänägäteneñ Başqarma komitetı cıyılışında Törek qorallı köçläre häm iminlek berämlekläre qullanğan cirle häm milli sistemalarğa yañaların östäwgä qarağan mäs’älälär söyläşelde. Kiläse yılnı berençe oçışı planlanğan HÜRJET oçqıçı öçen berençe êtaplı seriyale citeşterü qararı qabul itelde.

“Yeni Şafak” basması beldergänçä Greŝiyaneñ Könçığış Urta diñgezdä totrıqsızlıq urnaştıruğa yünälgän säyäsätläre Törkiyäneñ täwäkkäl torışı yärdämendä ber-ber artlı yuqqa çığarıla. Amerika Quşma Ştatları EastMed ütkärgeçenä kürsätkän xuplawın beterde. Franŝuz Total häm Amerikan ÊksonMobil şirkätläreneñ dä Krit utrawı sulıqlarındağı seysmik tikşerenü êşçänleklären tuqtatuı öyränelde.

“Watan” gazetı citkergänçä Törkiyäneñ Sälamätlek saqlaw ministrı Faxrettin Koca Kovid-19ğa qarşı yasalğan häm barlıq faza êşçänleklärennän uzğan cirle vakŝina Turkovaknıñ Qıtay vakŝinası Sinovaktan tağın da täêsirle buluın belderde. Turkovaknıñ Bötendön’ya sälamätlek saqlaw oyışması kriteriylarına da turı kilüen açıqlağan ministr: “Turkovak vakŝinabıznı imin räweştä qullana alabız, monnan berkem dä şiklänmäsen,” – dide.

“Star” basması xäbärenä kürä Marokko matbuğatı Marokko Patşalıq flotınıñ 7 tiz höcüm itüçe köymä häm 1 Korvet alu öçen Törkiyä belän kileşü tözüen yazdı. Söyläşülärneñ 2021nçe yılnıñ oktäbrendä başlanuın yazğan il matbuğatı kileşüneñ barlığı 222 million dollarlık buluın belderde. Xäbärlärgä kürä Marokko Törkiyäneñ xärbi sänägäte öçen üsüçe bazarlardan bersenä äylände.

“Sabah” gazetı yazğança Kovid-19 kizüe hawa yullarına tiskäre täêsir itkäç global’ şirkätlär 2021dä zur zarar kürde. Bankrot bulğan hawa yulı şirkätläre sanı artqanda zur şirkätlär barı tik däwlät yärdäme belän ayaqta torıp aldı. Kizü waqıtında şaqtıy hawa yulı şirkäte oçışların tuqtattı, läkin Törek hawa yulları isä yaña şähärlärgä oçıp, üseşen däwam iterde. Awrupada liderlıknı saqlap qaldı.