Törek matbuğatına küzätü 17.06.2021
17nçe iyün' könne çıqqan qayber törek gazetlarına küzätü
“Sabah” gazetı Ärdoğannıñ Azärbaycan parlamentındağı tarixi süzlären citkerä.
Törkiyä ilbaşı Räcäp Tayyip Ärdoğan Azärbaycan milli parlamentına möräcäğat’ itkändä tarixi süzlär äytte: “Bügen bez barlıq mömkinleklärebez belän Azärbaycannıñ yanında. Böten dön’ya belsen – irtägä dä şunda bulabız”. Ul 6lı paltforma tözergä täq’dim itüen dä citkerep: “Rusiyä, Törkiyä, Azärbaycan, İran, Ärmänstan häm Gruziya. Regionda monnan soñ doşmanlıq betsen,”-dide.
“Star” gazetı Lessernıñ süzläre belän “Törkiyä NATOda ğadättän tış ähämiyätkä iyä berlektäş” dip yaza.
Germaniyäneñ Marşall fondınıñ räis urınbasarı häm tışqı säyäsät mödire doktor Lan Lesser: “Törkiyäneñ ğadättän tış ähämiyätkä iyä berlektäş buluı NATOda kiñ qabul itelä. Xäzerge krizislarnıñ kübesen Törkiyäneñ yärdämennän başqa çişü awır,”-dide.
“Yeni Şafak” gazetı “Täwge cirle atom-töş batareyası” xaqında citkerä.
Törkiyäneñ Yoldız texnik universitetı ozın ğomerle atom-töş batareyası uylap taptı. Anıñ yärdämendä ğaläm korabı, yöräk batareyaları, su astı sistemaları häm fänni stanśiyälär şikelle ozaq waqıt küzätüsez êşli aluçı cihazlarğa köç birelergä mömkin.
“Hürriyet” gazetı çit illärdäge 4 meñ 862 mädäniyät äsäreneñ Törkiyägä tapşırıluın xäbär itä.
Mädäniyät häm turizm ministrlığı 2003nçe yıldan birle Törkiyäneñ çit illärdäge äsärlärennän 4 meñ 862sen watanğa qaytardı. Alarnıñ 423en bıyılnıñ 6 ayında tapşırdılar.
“Habertürk” gazetı İstanbul aêroportınıñ uñışı xaqında yaza
Awrupa hawa navigaśiyäse qurqınıçsızlığı oyışması EUROCONTROL äzerlägän xisapqa qarağanda, İstanbul aêroportı sişämbe könne ğamälgä aşırılğan 653 oçış belän Awrupadağı aêroportlar arasında berençe buldı.
