Törek matbuğatına küzätü 16.06.2021
16 nçı iyün' könne basılıp çıqqan qayber törek gazetlarına küzätü
”Sabah” gazetı Törkiyä ilbaşı Räcäp Tayyip Ärdoğannıň Şuşada Azärbaycan ilbaşı İlham Aliyev belän Şuşa Deklaraśiyäsenä qul quyuı turında yaza. Ärdoğan biredä yasağan çığışında Qarabaxnıň xucaları qulında buluın belderep ,”Törkiyä bularaq Şuşada iň qısqa waqıt êçendä baş konsullıq açarğa uylıybız” dip yaxşı xäbärne dä citkerde.
”Xörriyät” gazetı yazğança, Törkiyä ilbaşınıň Azärbaycanğa räsmi säfäre qısalarında Azärbaycan ilbaşı İlham Aliyev “Baykar” şirkäte ğomum mödire Xaluk Bayraktarğa Qarabax ordenı tapşırdı. Ul bu büläkkä “Baykar” şirkäte tarafınnan êşläp çığarılğan qorallı keşesez hawa apparatlarınıň Qarabax ciňüendä zur rol’ uynağanı öçen layıq buldı.
”Yaňa Şafak” gazetı citkergänçä, Germaniyädä çığuçı “Xandel’sblat” gazetı Törkiyäneň qorallı keşesez hawa apparatlarına qağılışlı mäqaläsendä “Baykar” şirkäte texnik mödire Sälçuk Bayraktarnı maqtap telgä aldı. “41 yäş’lek Törkiyä êşmäkäre Bayraktar ixtimal suğışlarda ileneň tağın da yaxşı şartlarda iyä buluına mömkinlek tudırdı häm kürşese Rusiyäneň açuın çığardı” digän yullar urın ala mäqalädä.
”Xäbär Törek” gazetı Törkiyäneň uzğan yıl 2 meň 480 megavattlıq yaňa gidroêlektr ênergiyäse belän Awrupada liderlığın saqlap qaluın häm dönyada ikençe urınğa kütärelüen xäbär itä.
”Star” gazetı Törkiyä öçen möhim forsat barlıqqa kilüe turında yaza. Awrupa rekonstrukśiya häm üseş bankınıň yäşel iq’tisad häm klimat xäräkätläre direktorı urınbasarı Kristian Karrarettonıň “ Vodorod taläbe xäzerge waqıtta kübräk Avrupadan kilä. Bu cähättän vodorod Törkiyädä citeşterelep Awrupağa satılırğa mömkin” digän süzlären uquçıları belän urtaqlaşa.