Törek matbuğatına küzätü 18.02.2021

“Habertürk” gazetı Ärdoğannıñ martta êtaplap ğadäti tormışqa qaytu turındağı belderüen citkerä.

Törkiyä ilbaşı Räcäp Tayyip Ärdoğan kabinet cıyılışınnan soñ yasağan belderüendä êtaplap ğadäti tormışqa qaytu prośessı başlanaçağın äytte. “Töbäklärne sälamätlek saqlaw ministrlığıbıznıñ kriteriylarına qarap 4 törkemgä bülep mart ayı başınnan ğadäti tormışqa qaytunı başlatabız. Töbäklärne az, urtaça, yuğarı häm bik yuğarı xäwefle bularaq büläçäkbez. Ğadäti tormışqa qaytu kalendaren da aña qarap töziyäçäkbez,”-dip söyläde ul.

“Yenişafak” gazetı Angliyä matbuğatınıñ törek dronnarın maqtawı xaqında yaza.

Törkiyäneñ qorallı keşesez hawa apparatları Angliyä matbuğatında könüzägendä qaluın däwam itä. “Telegraf” gazetı Tawlı Qarabaxta Azärbaycannıñ uñışı artında törek dronnarı toruı xaqında yaza.

“Star” gazetı “Greśiyä keşelek cinayäte êşläwen däwam itä” dip citkerä.

Törkiyä milli saqlanu ministrlığı Greśiyädä telefonnarı häm aqçaları alınğan, köç qullanaraq qanunsız räweştä Törkiyägä çığarılğan häm tuñıp ülä yazğan qaçaqlarnıñ qotqarıluın belderde.

“Sabah” gazetı ministr Karaismailoğlunıñ yasalma iyärçennär turındağı belderüen citkerä.

Törkiyä transport häm infrastruktura ministrı Adil Karaismailoğlu ğalämğä oçırtılğan Türksat 5A belän bäyle belderü yasadı. “İyärçenebezneñ älegä qadär barlıq sistemaları ber problemasız êşli. Ul orbitağa barıp citkäç testlar yasalaçaq häm iyün’ ayınnan êşli başlayaçaq,”-dide ul.

“Hürriyet” gazetı Törkiyäneñ ğıynvarda iñ küp xalıqara transfer yasağan 4nçe il buluın xäbär itä.

Törkiyä futbolda 2021nçe yıl ara transfer çorında iñ küp xalıqara transfer yasağan illär arasında 4nçe urınğa çıqtı.  FİFAnıñ xisabına qarağanda, İspaniyä – 145, Portugaliya – 143, Angliya – 140, Törkiyä 123 xalıqara transfer tormışqa aşırdı.