Төрeк мaтбугaтынa күзәтү - Törek matbuğatına küzätü 11.01.2021

“Sabah” gazetı: “Awrupa Berlege dialognı däwam itärgä äzer”

İlbaşı Räcäp Tayyip Ärdoğan belän Awrupa Berlege komissiyası başlığı Ursula von der Leyen arasında ütkärelgän video konferenśiya söyläşüeneñ çağılışları däwam itä. Awrupa Berlege tışqı mönäsäbätlär häm iminlek säyäsäte yuğarı wäkile Josep Borrell Törkiyä belän dialog öçen êşläwne däwam itärgä äzer buluların belderde. Tışqı êşlär ministrı Mäwlüt Çavuşoğlu da: “Êçkersez häm näticälärgä yünältelgän dialog öçen Bryussel’gä barunı sabırsızlıq belän kötäm”, - dip äytte. Çavuşoğlunıñ 21nçe ğıynvar’da Bryussel’gä baruı küzdä totıla.

“Xäbär Türk” gazetı: “Törkiyä Qırğızstandağı saylawnıñ tınıçlıq häm xozur şartlarında tämamlanuınnan qanäğät”

Tışqı êşlär ministrlığı Qırğızstanda uzdırılğan waqıtınnan êlek ilbaşı saylawı häm citäkçelek sistemasına qağılışlı referendumnıñ tınıçlıq häm xozur şartlarında tögällänüennän qanäğätlelek xis itelüen belderde. Belderüdä: Törkiyä Qırğızstandağı demokratik barışnıñ kiñ qolaçlılıq häm ictimağıy kileşü nigezendä yomğaqlanuı yünäleşendä yasalaçaq adımnarnı yaqlayaçaq”, - dip äytelde. Qırğızstandağı ilbaşı saylawında, töğayen bulmağan näticälärgä kürä, tawışlarnıñ 79,18%ın alğan êlekke baş ministr Sadır Caparovnıñ ciñüe belderelgän ide.

“Star” gazetı: “Törkiyä häm Ukraina arasında saqlanu proyektları”

Ukrainanıñ Törkiyä ilçese Andrii Sybiha Törkiyä häm Ukraina arasında 30dan kübräk saqlanu proyektınıñ başqarıluın belderde. “Bayraktar TB2” keşesez hawa apparatı sistemaların satıp alğan berençe çit illärdän berse buluların assızıqlawçı tulı wäqalätle ilçe Sybiha: “Här ike taraf ta Ukraina motorlarınıñ Törkiyädä êşläp çığarıluı belän bergä Törkiyäneñ keşesez hawa apparatlarınıñ Ukrainada citeşterelüe mäs’äläsendä söyläşülär ütkärä”, - dip äytte.

“Yäni Şafak” gazetı: “Sänäğät êksportı yılnı rekord belän tögälläde”

Törkiyä sänäğät tarmağı, yaña tör koronavirus (Kovid-19) kizüeneñ tiskäre yoğıntısınnan saqlanıp, uzğan ayda başqarğan 13 milliard 308 million 486 meñ dollar külämendäge êksport belän 2020nçe yılnıñ iñ yuğarı tışqı satuına ireşte. Törkiyäneñ sänäğät êksportı uzğan yılnıñ noyabr’ ayına qarağanda 9%, 2019nçı yılnıñ dekabr’ ayına qarağanda 15,8% artış kürsätte. Dekabr’dä iñ küp êksport artışı saqlanu häm aviaśiya tarmağında buldı. 

“Xörriyät” gazetı: “Milliardlıq EXPO Gollivudqa köndäş”

Antaliyada 1 milyard 800 million lirağa tözelgän EXPO mäydanı, däw fil’m töşerü mäydançığına äylänep, Gollivudqa köndäş bula. Tanılğan rejissyor Gay Ritçi häm tanılğan aktyor Djeyson Statham qatnaşındağı “Biş küz” fil’mı Antaliyada töşereläçäk. Kino töşerü öçen aktyorlar aldıbızdağı könnärdä Antaliyağa kiläçäk. Fil’mnı 8nçe fevral’dä töşerä başlıylar.