Törek matbuğatına küzätü 28.05.2014

“Habärtürk” gazetı “Yumartlığıbız bik qimmätle” dip atalğan yazmasında ber könlek säfär belän Törkiyägä kilgän Norvegiya tışqı eşlär ministrı Borge Brendeneñ, Törkiyäneñ Süriyädäge watandaşlar suğışınnan qaçqan süriyälelärgä qarata yumartlığınıñ bik qimmätle buluın belderep: “Törkiyä Süriyädäge krizisqa säyäsi çişeleş tabu öçen töp uyınçı”, - dip äytkän süzlären citkerä.

“Yäni Şafak” gazetı “Bryussel baştübän” isemle yazmasında Awrupadağı saylaw yul açqan säyäsi zilzilä şokınıñ däwam itüenä iğtibarnı yünaltä. Gazet Awrupa Berlege äğzase 28 ildäge saylaw marafonında İslamofobiya tarafdarları häm möhacirlärgä qarşı bulğan rasaçılar belän Awrupa Berlegenä qarşı çıqqan millätçe häm radikal sul partiyalarnıñ uñışınnan soñ panikağa birelgän Awrupa Berlege liderlarının “zıyannı bilgeläw” öçen Bryusseldä çirattan tış cıyıluın xäbär itä.

Gazet yuğarı däracäle oçraşu aldınnan çığış yasawçı Frantsiya İlbaşı Fransua Ollandnıñ Awrupa Berlegeneñ wäqälätlären kimetüe zarurlığın äytüen yaza. Yazmada Germaniya Kantslerı Angela Merkelneñ dä berençe çirattağı östenlekneñ iqtisadnı köçäytü buluına basım yasawı äytelä.

“Akşam” gazetınıñ iqtisad säxifäsendäge “Hilti Törkiyäne nığıtma itep sayladı, 2013tä 34%qa üste” dip atalğan yazmasında tözeleş, mexanika, elektr, energetika häm industriya tarmağında eşläwçe professionallarğa qağılışlı eşlänmälären häm xezmätlären täqdim itüçe “Hilti Törkiyä”neñ 34%qa üsüen yaza. Gazet 120dän kübräk ildä eşçänlek alıp baruçı, 17 yıl inde Törkiyä bazarında bulğan “Hilti”neñ soñğı 3 yıldır Törkiyä ofisın Urta Aziyä häm Ğiraqtan cawaplı nığıtma-baza bularaq saylağan wazğiyättä buluın belderä.

“Star” gazetı “İtaliannardan däw daru kapitalı” isemle yazmasında Törkiyädä 2008nçe yıldan birle eşçänlek alıp baruçı üzäge İtaliyada urnaşqan “Recordati” daru şirkäteneñ Törkiyäneñ Täkirdağ Çärkazköy oyışqan sänäğät töbägendä yaqınça 50 million dollarlıq qorılmanıñ nigezen saluın xäbär itä.

“Sabah” gazetınıñ mädäniyät-sänğät säxifäsendäge “Ber filmğa yaqınça 23 büläk” isemle yazmasında Kannda “Altın palma” yawlağan “Qış yoqısı” filmınıñ rejissyorı Nuri Bilgä Cäylannıñ bügengä çaqlı töşergän 7 filmınıñ 166 büläk aluın yaza. Gazet Cäylannıñ här ber filmğa turı kilgän urtaça premiya sannıñ 23 buluın assızıqlıy.