Törek matbuğatına küzätü 06.05.2014

“Habärtürk” gazetı “İlbaşı Gül Görcestanda” isemle yazmasında İlbaşı Abdullah Gülneñ Törkiyä-Gruziya-Azärbaycan öç yaqlı yuğarı däräcäle oçraşuında qatnaşu häm räsmi säfär yasaw öçen düşämbe könne Görcestanğa-Gruziyağa kitüen xäbär itä häm İlbaşu Gülneñ yulğa çığar aldınnan: “Maqsatıbız 1 milliard yarım dollar däräcäsendä bulğan säwdä külämen arttıru”, - dip äytkän süzlären citkerä.

“Yäni Şafak” gazetı Gretsiyanıñ Törkiyägä viza uñaylığın tormışqa aşırırğa äzerlänüen yaza. Gazet Gretsiya Tışqı eşlär ministrlığı süzçese Konstandinos Kutrasnıñ: “Vizanıñ tulısınça beterelüe eşçänlegeneñ başında torabız”, dip äytüen belderä.

Yazmada Gretsiya Tışqı eşlär ministrlığı süzçese Konstandinos Kutrasnıñ Törkiyä belän Gretsiya arasında viza mäs’äläsendä törle uñaylıqlarnıñ buluına iğtibarnı yünältüe assızıqlana.

“Akşam” gazetınıñ iqtisad säxifäsendäge yazmasında Belorusnıñ Ankara tulı wäqälätle ilçese Andrei Savinykhnıñ Ägäy töbäge sänäğät palatasında oyıştırılğan “Belorus-Törkiyä kapital salu häm xezmättäşlek mömkinlekläre seminarı”nda yasağan çığışında: “2nçe iyünnän başlap törek xalqı Belorusqa vizasız bara alaçaq. İke il arasındağı säwdä bu kileşü belän tağın da artaçaq,” – dip äytüen belderä.

Yazmada ike il arasındağı mönäsäbätlärneñ üseş aluına öleş kertäçäk vizadan azat bulu kileşüenä uzğan yılda qul quyıluı belderelä.

“Sabah” gazetı “Tözeleş yärminkäse 37nçe tapqır işeklären açtı” isemle yazmasında Törkiyä tözeleş tarmağınıñ häm töbäkneñ iñ zur oçraşu urını bulğan 37nçe Tözeleş yärminkäse “Turkeybuild İstanbul”nıñ bügen İstanbulda açıluın xäbär itä.

“Vatan” gazetı “Bilkent häm Koç iñ yaxşı 100 universitet arasında” isemle yazmasında “Times Higher Education” isemle tanılğan mäğärif tikşerenü oyışması ütkärgän tikşerenügä kürä, qorılu waqıtları 50 yıldan kübräk bulmağan dönyanıñ iñ yäş yuğarı uqu yortları isemlegendä Bilkent universitetınıñ 31nçe buluın yaza.

Yazmada berençe yözlektä urın alğan ikençe törek yuğarı uqu yortı bulğan Koç universitetınıñ isä isemlekkä 41nçe bularaq kerüe assızıqlana.

“Milliyät” gazetı “Galatasaray” xatın-qızlar basketbol komandasınıñ “Fänärbahçä” taqımın soñğı matçta 73-54 isäbe belän ciñep çempion buluın yaza.