Êç pılaw (iç pilav)

Törek aş-sularınıñ töp rizıqlarınnan berse - pılaw. Anı, başlıça, döge belän xäzerlilär. Pılaw Ğosmanlı çorınnan başlap bügengä qadär tabınnarnıñ kürke bulıp tora. Döge Ğosmanlığa Qıtaydan kilgän bulsa dä, soñınnan şulqadär küp töre häm peşerü ısulı uylap çığarılğan ki, anıñ belän xäzerlängän rizıqlar Ğosmanlı aş-sularınıñ nigezen täşkil itkän.  Aralarında it, balıq, diñgez produktları, quzaqlılar häm yäşelçälär belän xäzerlängännäre bar. Kübese onıtılğan bulsa da, ber öleşe törek aş-suları isemlegenä dä kergän. Şulardan berse - “êç pılaw”nı peşerergä öyränäçäkbez. Anı êçenä bik küp närsä quşıp yasaluı öçen şulay atıylar. 

Başta êç pılawnı xäzerläw öçen kiräk bulğan azıq-tölekne sanap çığıyq:

150 gr bawır

1,5 stakan döge

1 turalğan suğan

2 aş qaşığı kedr çikläwege

2,5 aş qaşığı kipterelgän waq yözem

yartı çäy qaşığı darçin

qalaq oçı belän qara borıç

4 qaşıq atlanmay

2,5 stakan cılı su

3 sabak waq itep turalğan petruşka

toz

Xäzer êç pılawnı xäzerläwgä çirat citte. Dögene ber sawıtqa salıp, östen qaplarlıq cılı su ağızabız häm toz sibep 30 minut şul kileş totabız. Soñınnan suıq suda berniçä tapqır yuıp sözäbez. Şul arada bawırnı 1-2 santimetrlı şaqmaqlar zurlığında turıybız. Waq kipkän yözemne çistartabız häm yomşasın öçen yartı säğat’kä suğa salıp quyabız.

2 qaşıq atlanmaynı ber käsrtüldä êretäbez. Anda kedr çikläwegen alsu töskä kergänçe qızdırabız.  Turalğan suğannarnı östäp qızdırunı däwam itäbez. Suğannar yomşarğaç bawırnı salabız. Barısın bergä urtaça utta 3-4 minut qızdırabız. Şunnan soñ kästrülgä 2 stakan yarım cılı sunı häm qalğan atlanmaynı salabız. Su qaynap çıqqaç sözelgän döge, toz, borıç, darçin häm waq kipkän yözemne quşıp qapqaçın qaplıybız. Başta köçle utta totabız, su qaynağaç utnı qısıp quyabız.  Döge sunı alıp betergängä qadär peşeräbez. Uttan alğannan soñ qapqaçın açmıyça 15-20 minut totabız. Soñınnan pılawnı ağaç qaşıq belän ciñelçä astın öskä äyländerep alabız häm turalğan petruşka sibep tabınğa çığarabız. Tämle bulsın!