Yözem pekmezeneñ faydaları

“Sälamät bulıyq” tapşıru tezmäbezneñ bu bülemendä yözem pekmezeneñ faydaları turında söyläyäçäkbez. Başqa törle anda doşab yäisä bekmez dip tä yörtälär. Ul üzendäge antioksidantlar häm minerallar nisbätennän bik ähämiyätle azıq. Pekmez – ciläk-cimeş yäisä yäşelçälärne waqlap maxsus texnologiyä nigezendä başqa berni östämiçä qaynatu näticäsendä barlıqqa kilgän quyı şirbät. Anıñ sälamätlegebezgä nindi uñay täêsire barlığın centekläp qarap çığıyq.

1.Depressiyägä qarşı faydalı

Daimi qullanılğan oçraqta pekmez sostavındağı magniy depressiyä häm borçılu waqıtında xälne yaxşırta. Ul nervlarnıñ tınıçlanuın täêmin itä häm bäxet gormonı bularaq bilgele serotoninnı bülep çığarunıñ artuına öleş kertä. Bu isä psixik sälamätlekne tärtipkä sala. Magniynıñ yoqını yaxşırtuı da käyefneñ kütärelüe öçen ähämiyätle. 

2.Söyäk häm teş sälamätlegen nığıta

Yözem pekmeze kal’śiyğa da bay. Älege êlement isä keşe sälamätlege öçen zur ähämiyätkä iyä. Keşe organizmında iñ küp oçrawçı mineral – kal’śiynıñ bötenese diyärlek söyäklärebez häm teşlärebezdä. Ul bigräk tä osteoporozğa qarşı êffektiv matdä.

Pekmez, monnan tış, söyäklärne sälamät kileş saqlawğa yärdäm itüçe timer, seleniy häm baqır çığanağı.

3.Qan basımı häm yöräk sälamätlegenä teräk bula.

Pekmezdäge kaliy qan basımın normada totarğa yärdäm itä. Ul, ber yaqtan, qan basımın kütärüçe natriynı organizmnan çığarırğa bulışa, ikençe yaqtan, tamırlarnıñ kiyerenkelegen beterep basımnıñ töşüen täêmin itä.

Monnan tış, kaliy yöräk sälamätlegen saqlawğa yärdäm itüçe êlement.

4.Êçäkleklärneñ êşçänlegen tärtipkä sala.

Yözem pekmeze êç qatu waqıtında bik êffektiv.

5.Yaman şeş qurqınıçın kimetergä mömkin.

Tabiğat’täge iñ köçle antioksidantlarnıñ berse kübesençä qızıl yözemdä oçrıy. Şuña kürä annan yasalğan pekmez dä antioksidantqa bay. Älege matdä yaman şeş küzänäkläreneñ bülenüen, kübäyüen häm taraluın kisätergä yärdäm itä. Monnan tış, anıñ yaman şeştän däwalağanda barlıqqa kilgän östämä qıyınlıqlarnı kimetüe uylanıla.

6.Tire sälamätlegenä faydalı

Antioksidantlar tire sälamätlegenä dä uñay täêsir itä. Tiregä zarar birergä mömkin irekle radikallarnı tuqtatıp qartayu prośessın äkrenäytügä öleş kertä.

7.Timer defiśitı bulğanda aşarğa kiñäş itelä.

Yozem pekmezendä timer bar, şuña kürä älege êlement citmägändä qullanırğa mömkin.

8.Küremnän aldağı kiyerenkelek häm menopauza simptomnarı waqıtında faydalı bula ala

Yözem pekmeze aşaw waqıtında organizmğa kerüçe magniy küremnän alda buluçı közän cıyıru, baş awırtu, ruxi xalät problemaların beterüdä êffektiv. Älege simptomnar menopauza çorında da kürelergä mömkin. Şuña kürä yözem pekmezendäge magniy bu çornıñ täêsiren kimetügä öleş kertä.

9.Yalqınsınulı revmatizm waqıtında faydalı bula ala.

Pekmezdäge antioksidantlar yakqınsınuğa qarşı êffektiv. Şuña kürä anı aşaw yalqınsınulı revmatizm waqıtında xälne yaxşırta ala.

Yözem pekmezen niçek aşarğa?

Yözem pekmeze daimi räweştä aşalğanda bik faydalı azıq. Här irtä anı 2 aş qaşığı qabıp quyu kiñäş itelä. Şul räweşle qullanğan waqıtta pekmez keşe organizmına kiräkle minerallarnı birä.

Tabib Mäxmät Uçar äzerlägän kiñäşlär

Tatarça podkastlar (тавыш язмаларыбыз)