Tatarstan xäbärläre - 7/2022

Röstäm Miñvexanov Qıtaynıñ Qazandağı yaña General’ konsulı belän oçraştı

Tatarstan ilbaşı Röstäm Miñnexanov bügen Qıtay Xalıq Cömhüriyäteneñ Qazandağı yaña General’ konsulı Syan Bo belän oçraştı. Oçraşu Tatarstan Respublikası Xökümät Yortında uzdı.

Röstäm Miñnexanov general’ konsulğa yaña wazifada uñışlar teläde häm Tatarstan belän Qıtaynıñ urtaq mänfäğät’läre küp, xezmättäşlek däräcäse bik yuğarı, dip bilgeläp ütte. Bu xaqta Tatarstan ilbaşınıñ matbuğat xezmäte xäbär itä.

“Qıtay belän tığız iq’tisadi häm mädäni êlemtälärne isäpkä alıp, sezneñ Tatarstanda êşläwegez qızıqlı häm näticäle bulır dip ömetlänäm”,-dide Tatarstan ilbaşı.

Tatarstanda inflyaśiya sentyabr’ ayında 14%qa qadär aqrınayğan

Tatarstanda bu yılnıñ sentyabrendä yıllıq inflyaśiya 14%qa qadär aqrınaydı, avgustta ul 14,7% bulğan. Rusiya bankınıñ Tatarstan Milli bankı bülege mäğ’lümatları şunı kürsätä dip xäbär itä “Tatar-inform” mäğ’lümat agentlığı. Ber ay êçendä azıq-tölek infliyasiyäse avgusttağı 18,1%tan sentyabr’dä 16,5%qa qadär kimede. Bu waqıt êçendä it häm söt produkśiyäsenä bäyälär 2%qa, makaron êşlänmalärenä häm yarmalarğa 5%qa arttı. Şul uq waqıtta balıq produkśiyäsenä bäyälär ber ay êçendä 0,3%qa üskän.

Azıq-tölek bulmağan äyberlärgä inflyaśiya avgusttağı 14,2%tan soñ sentyabr’dä 14 %qa qadär kimede. Tözeleş materiallarına bäyä töşü däwam itte.

Xezmät kürsätü ölkäsendä inflyaśiya avgusttağı 11,3%tan soñ 10,8%qa qadär kimede. Êlemtä xezmätlärenä bäyälär artu ayıruça aqrınayğan - avgusttağı 16,8%tan soñ 14%qa qadär töşkän. Şulay uq mäğarif ölkäsendä dä bäyä töşü küzätelä. Şul uq waqıtta çit il turizmı häm şifaxanä-sälamätländerü xezmätläre qıymmätlänüen däwam itä.

Bıyıl infliyaśiya iñ yuğarı kürsätkeçkä aprel’dä kütärelgän ,ul waqıtta bu kürsätkeç yılına 18,6% terkälgän. 

“İslam. Berençe adımnar” proyektına 180 keşe yazılğan

Qazanda Näzarätneñ iñ möhim proyektlarınnan berse – namaz uqırğa öyrätü häm İslam nigezläre belän tanıştıru buyınça çirattağı “İslam. Berençe adımnar” dip isemlängän qısqa waqıtlı kurslar başlandı. Tatarstan möftiyäteneñ konferenś-zalında däreslärne ütkärü öçen cawaplı zatlar häm ostazlar qatnaşında uqularnı açıp cibärü tantanası ütkärelde. Unınçı tapqır ütkärelüçe proyektta qatnaşuçılarğa üget-näsıyxät süzlären “Möxämmädiyä” mädräsase direktorınıñ berençe urınbasarı ,Qazannıñ “Ğailä” mäçete imam-xatıybı Röstäm xäzrät Xäyrullin citkerde. 2018 nçe yıldan Tatarstan möftiyäteneñ sośial’ bülege tarafınnan oyıştırıluçı çirattağı namazğa öyränü däreslärenä 180 keşe yazıldı. Bıyılğı şäkertlärneñ küpçelegen güzäl zatlar täşkil itä dip belderä Tatarstan Respublikası möselmannarınıñ Diniyä Näzaräte.

Röstäm Miñexanov Märcäni mäçeten restavraśiyälärgä quştı

Tatarstan ilbaşı Röstäm Miñnexanov Märcäni mäçeten restavraśiyäläw öçen dokumentlar äzerlärgä boyırdı dip xäbär itä “Tatar – inform” mäğ’lümat agentlığı.  Ul älege qararnı Qazannıñ tarixi üzägen qarağanda birde. Älege mädäni miras ob’yektında restavraśiya soñğı märtäbä 2005 nçe yılda bulğan. Röstäm Miñnexanov mäçetneñ fasadın häm tübäsen tärtipkä kiterergä yöklämä birde. Restavraśiya êşläre berniçä êtapta uzdırılır dip kötelä.

Sankt-Peterburg şähärendä Tatarstan kinosı köne bula

18 nçe oktyabr’dä Sankt-Peterburg şähärendä “PiterKiT” Xalıqara studentlar film’narı festivale qısasında “Töbäk kinematografınıñ uñışlı täcribäse.Tatarstan kinosı köne” bula. Bu xaqta Bötendön’ya tatar kongressınıñ matbuğat xezmäte xäbär itä.

Çara programmasına “Tarlan” tulı metrajlı fil’mı (Tatar ädäbiyätı klassigı Ğalimcan İbrahimovnıñ “Almaçuar” äsäre motivları buyınça töşerelgän ,Tatarstan belän Qazaqstannıñ urtaq proyektı), fil’m rejissyerı Yuliya Zaxarova belän icadi oçraşu, “Çäkçäk party”- festival’dä qatnaşuçılar häm qunaqlar öçen Tatarstan milli rizıqların täq’dim itü kergän. Çaralar Sankt-Peterburg däwlät kino häm televideniye institutında uzaçaq.